काठमाडौं, १४ चैत्र । बैकल्पिक खेलाडीका रूपमा मैदान प्रवेश गरेका  दीपकराज सिंह ठकुरीले खेलकाे इज्नुरी समयमा बराबरी गाेल गरेपछि नेपाल प्रधानमन्त्री थ्रिनेसन्स कपकाे फाइनलमा प्रवेश गरेकाे छ । नेपाल काठमाडौँमा जारी प्रधानमन्त्री थ्रिनेसन्स कपमा भुटानसँग १–१ को बराबरी खेल्दै नेपाल फाइनलमा प्रवेश गरेको हाे ।

नेपालले अब चैत्र १७ गते शुक्रबार फाइनलमा लाओसँग प्रतिष्पर्धा गर्नेछ । मंगलबार दशरथ रंगशालामा भएकाे खेलमा नेपालसँग बराबरी खेलेसँगै जीत विहीन बन्दै भुटान प्रतियोगिताबाट बाहिरिएको छ ।

खेलमा भुटानले १९ औँ मिनेटमा तेञ्जिङ नोर्बुकाे गाेलबाट अग्रता लिएकाे थियाे । उनले पहिलाे हाफकाे १९ औं मिनेटमा दावा छिरिङको कर्नरमा हेडर गोल गरे ।

पहिलाे हाफसम्म लय समात्न नसकेकाे नेपालले दाेश्राे हाफमा अट्याकिङ खेल खेल्दै भुटानलाई दबाबमा राख्न सफल भयाे । खेलकाे ५० औँ मिनेटमा अञ्जन विष्ट घाइते हुँदै मैदानबाट बाहिरिएपछि मैदान प्रवेश गरेका दीपकराज सिंह ठकुरीले निर्धारित समयकाे अन्तिम मिनेटमा गाेल गरे । उनले निशान खड्काको कर्नरमा अनन्त तामाङको हेड मार्फत आएकाे बलमा गाेल गरे ।

नेपालसँग भुटानले १३ खेलपछि बराबरी गरेकाे छ । यसअघिका १२ खेलमा भुटान नेपालसँग पराजित भएकाे थियाे । नेपालले भुटानविरुद्ध आफ्नो अपराजित रेकर्डलाई कायमै राखेको छ ।

प्रतियाेगितामा ४ अंक बटुल्दै नेपाल शीर्ष स्थानमा रहँदै फाइनल पुग्दा ३ अंकका साथ लाओस दाेश्राे स्थानमा रहँदै फाइनल पुगेकाे छ । नेपालसँग भुटान बराबरीमा रोकिएपछि लाओसकाे फाइनल यात्रा तय भएकाे हाे ।

प्रतियोगिताको विजेताले ५ हजार अमेरिकी डलर र उपविजेताले ३ हजार अमेरिकी डलर पुरस्कार पाउनेछन् । सर्वोत्कृष्ट खेलाडीले ५ सय अमेरिकी डलर पाउनेछन् ।