काठमाडाैं, २५ चैत्र । देशले ‘समृद्ध नेपाल सुखी नेपाली’ चाहिरहेको बताउँदै नेकपा एमालेका अध्यक्ष केपी शर्मा ओलीले त्यसका लागि नेकपा एमालेले अगाडी सारेकाे जनताकाे बहुदलीय जनवाद नै प्रमुख विचार रहेकाे बताएका छन् ।  

शनिबार राजधानीमा अनेमसंघको सातौ राष्ट्रिय सम्मेलनको उद्घाटन गर्दै ओलीले ‘समृद्ध नेपाल सुखी नेपाली’ विचारहरूकाे पनि विचार रहेको जिकीर गरे । ‘देशले समृद्ध नेपाल सुखी नेपाली चाहिरहेको छ । हाम्रो राष्ट्रिय आकांक्षा नेपाल समृद्ध हुनुपर्छ नेपाली खुसी हुनुपर्छ ।’ समृद्ध नेपाल सुखी नेपाली विचारहरूको पनि विचार, आजको जनताको बहुदलीय जनवाद भएकाे ओलीकाे भनाइ छ । एमाले फुटाएर पदको लोभ देखाउँदा समेत पार्टी बलियो बनाउन अनेमसंले निर्वाह गरेकाे भूमिकालाई धन्यवाद दिए ।

‘पार्टी जोगिएर देशको पहिलो पार्टी बनेर उभिन महिला दिदीबहिनीहरूको हात छ । महिला दिदीबहिनीहरूलाई धन्यवाद दिन चाहन्छु, एमाले फुटाउ केन्द्रीय कमिटी दिन्छु भनेको कोही पनि छैन होला । पार्टी फुटाउ पोलिटब्यूरो फलानाे भन्दै पद दिएका होलान् । तर पनि तपाईंहरू एमालेमा रहेका कारणले पार्टी बलियो बनेको छ ।’ ओलीले आफ्नो संगठनकी पूर्वअध्यक्ष विद्या भण्डारीलाई नेपालको पहिलो महिला राष्ट्रपति बनाएर मुलुककै लागि गर्व गर्न लायक काम गरेको पनि बताए ।

अध्यक्ष ओलीले पार्टीभित्र गुटबन्दी नगर्न पनि निर्देशन दिए । एमालेभित्र अहिले कुनै पनि गुटबन्दी नभएको भन्दै निहित स्वार्थका लागि गुट बनाउने काम नगर्न सचेत गराए । पार्टीभित्र योग्यता, क्षमता र काम गरेर जिम्मेवारी दिइने जनाउँदै भने–‘आजको एमालेभित्र कुनै पनि किसिमको गुटबन्दी छैन । त्यहाँ प्रतिपक्ष छैन । स्वार्थका लागि कसैले यस्तोउस्तो नभन्नुस् । हुन्छ नि स्वार्थका लागि यसो ग्रुप बनाएझैं । खेल्न खोजे झैं त्यस्तो खालको नगर्नुहोला । एकछिन स्वार्थ पूरा भएन भने पनि केही फरक पर्दैन । संगठन एकजुट हुनुपर्दछ । योग्यता, क्षमता, कामलाई हेरेर जिम्मेवारी दिन्छौं ।’

ओलीले अखिल नेपाल महिला संघले पनि ‘समृद्ध नेपालः सुखी नेपाली’ बनाउने पार्टीको उद्देश्य प्राप्त हुने गरी आफ्नो संगठनलाई चलायमान बनाउनुपर्ने बताए । शनिबारबाट सुरू भएकाे अधिवेशनमा ७७ वटै जिल्लाबाट प्रतिनिधिहरूकाे सहभागीता रहेकाे छ । सम्मेलन भाेलीसम्म चल्नेछ ।