बारा, १० बैशाख । मधेस प्रदेशका मुख्यमन्त्री सरोजकुमार यादवलाई निर्वाचन आयोगले स्पष्टिकरण सोधेको छ । उपनिर्वाचनको स्वच्छता, स्वतन्त्रता र निष्पक्षतामा प्रतिकूल असर पर्ने गरी आचारसंहिता विपरित कार्य गरेको भन्दै आयोगले २४ घण्टे स्पष्टिकरण सोधेको हो ।

बारा निर्वाचन क्षेत्र नं. २ मा आइतबार मतदान भइरहेको बेला निर्वाचनको स्वच्छता, स्वतन्त्रता र निष्पक्षतामा प्रतिकूल असर पर्नेगरी अनुमतिबिना निर्वाचन आचारसंहिता विपरीत हुनेगरी के कति कारणबाट पचरौता नगरपालिका क्षेत्रमा जानुभएको हो ? भनी स्पष्टीकरण सोधिएको हो ।

‘तपाईं त्यहाँ जाँदा प्रयोग गरेको सवारीसाधन र सुरक्षा व्यवस्था सरकारी हो, होइन ? तपाईंको यो कार्यले पदको गरिमा र निर्वाचन आचारसंहिता, २०७९ को दफा ५ को उल्लंघन हुन्छ, हुँदैन ? निर्वाचन आचारसंहिता उल्लंघन गरेकोमा तपाईंलाई निर्वाचन आयोग ऐन, २०७३ बमोजिम कारबाही किन नगर्ने ?’ स्पष्टिकरण पत्रमा भनिएको छ ।

बारा २ मा जनता समाजवादी पार्टीका अध्यक्ष समेत रहेका उपेन्द्र यादव गठबन्धनका साझा उम्मेदवार छन् । मुख्यमन्त्री यादव उपेन्द्रको पक्षमा चुनावी माहौल बनाउन सरकारी स्रोत साधनको दुरुपयोग गरी हिँड्न थालेपछि आयोगले स्पष्टीकरण सोधेको हो ।

बारा २ मा जनमत पार्टीका शिवचन्द्र कुशवाहा, नेकपा एमालेका रमेश खरेल लगायतको उम्मेद्वारी रहेको छ ।