तनहुँ–१ मा स्वर्णीमलाई प्रारम्भिक गणनामै दोब्बरको अग्रता
दमौली, ११ बैशाख । बैशाख १० गते सम्पन्न प्रतिनिधि सभा सदस्यको उपनिर्वाचनमा तनहुँ क्षेत्र नम्बर १ मा राष्ट्रिय स्वतन्त्र पार्टीका उम्मेदवार दोब्बर मतले अगाडी छन् । रास्वपाका स्वर्णीम वाग्ले निकटतम प्रतिद्वन्द्वी नेपाली कांग्रेसका उम्मेदवारसँग दोब्बर मतान्तरले अगाडी रहेका हुन् ।
सो क्षेत्रबाट मंसिर ४ को निर्वाचनमा निर्वाचित रामचन्द्र पौडेल राष्ट्रपतिमा निर्वाचित भएसँगै भएको उपनिर्वाचनमा वाग्लेले सुरूआतबाटै अग्रता कायम राखेका छन् ।
९२५७ मत गणना हुँदा वाग्लेले ५०१९ मत पाउँदा उनलाई पछ्याइरहेका नेपाली कांग्रेसका गोविन्द भट्टराईले २३५१ मत पाएका छन् । तेश्रो स्थानमा नेकपा एमालेका सर्वेन्द्र खनाल छन् । उनले १५४९ मत ल्याएका छन् ।
तनहुँ–१ को निर्वाचनमा हालसम्म छ वडाको अन्तिम मतपरिणाम मुख्य निर्वाचन अधिकृत कोमलप्रसाद आचार्यले जानकारी दिएका छन् । जस अनुसार आँबुखैरेनी–१, आँबुखैरेनी–२, भानु–१०, भानु–८, भानु–३, भानु–७ र को नौ हजार दुई सय ५७ मतगणना सकिएको छ ।
तनहुँ क्षेत्र नम्बर १ अन्तर्गत ४२ वडामा ६३ हजार सात सय ५७ मत खसेको थियो । मतगणना जिल्ला समन्वय समितिको सभाहलका दुई ठाउँमा कार्य जारी छ । निर्वाचन आयोगले मंगलबार बेलुकासम्म सबै मतपरिणाम आउने जनाएको छ ।
0 प्रतिकृया