सन्दीपकाे उत्कृष्ट प्रदर्शनमा कतारलाई हराउँदै नेपाल सेमिफाइनलमा
काठमाडाैं, १४ बैशाख । कमजाेर ब्याटिङ गरेपनि उत्कृष्ट व्याटिङका कारण नेपाल एसिसी प्रिमियर कपकाे समूह 'ए' को विजेताको रुपमा सेमिफाइनलमा प्रवेश गरेको छ । कतारसँग समुह चरणकाे अन्तिम खेलमा कतारलाई पराजित गर्दै नेपाल सेमिफाइनलमा प्रवेश गरेकाे हाे ।
बिहीबार कीर्तिपुरस्थित त्रिवि मैदानमा समूह चरणको अन्तिम खेलमा नेपालले कतारलाई ६८ रनले पराजित गर्दा सन्दीप लामिछाने नायक भए । नेपालले दिएको १५८ रनको सामान्य लक्ष्य पछ्याएको कतार २५.१ ओभरमा ८९ रनमा अलआउट हुँदा सन्दीपले पाँच विकेट मात्र लिएनन् व्याटिङमा पनि उत्कृष्ट खेले ।
सन्दीपले बलिङमा पाँच विकेट लिँदा ब्याटिङतर्फ नेपालका लागि सर्वाधिक नटआउट ४२ रन जोडे । सन्दीपले ९.१ ओभरमा ५ विकेट लिँदा ३ मेडन राखेर १४ रन मात्र खर्चिए । नेपालका लागि सोमपाल कामीले तीन विकेट र ललितनारायण राजवंशीले दुई विकेट लिए ।
टस हारेर पहिले ब्याटिङ गरेको नेपाल सुरुवात खराब रह्याे । नेपाल ४०.२ ओभरमा १५७ रनमा अलआउट भयो । नेपालका लागि सन्दीपले सबैभन्दा बढी नटआउट ४२ रन जोड्दा ५८ बलमा ६ चौका प्रहार गरे ।
चार ओभर चल्दै गर्दा दुई विकेट गुमाएको नेपालका ओपनर कुशल भुर्तेल दोस्रो ओभरको दोस्रो बलमा २ रनमा आउट भए । भीम सार्की चौथो ओभरको तेस्रो बलमा ६ रनमा पेभिलियन फर्के । ओपनिङ ब्याट्सम्यान आसिफ शेख १९ रन बनाएर १२.४ ओभरमा आउट भए ।
त्यसपछि कप्तान रोहितकुमार पौडेल चौथो विकेटको रुपमा २७ रन बनाएर आउट हुँदा ३६ बलमा २ चौका प्रहार गरे । कुशल मल्ल पाँचौ विकेटको रुपमा १७.१ ओभरमा मात्र ३ रन जाेड्दै आउट भए । सोमपाल कामी ११ रनमा आउट हुँदा नेपालले २१ ओभरमा ६ विकेट गुमाएर ८४ रन मात्र जाेडेकाे थियो ।
सातौं विकेटको रुपमा आरिफ शेख ११ रन बनाएर आउट भए । उनी २६.२ ओभरमा आउट हुँदा नेपालले १०२ रन जोडेको थियाे । लगत्तै चार बलपछि दीपेन्द्रसिंह ऐरी आउट भए । ऐरीले १२ रन मात्र जोड्न सके । २८औं ओभरमा गुल्शन झालाई ७ रनमा कतारका मुनवीराले क्याच गर्दै पेभेलियन पठाए ।
ललितनारायण राजवंशी १ रनमा एलबिडब्लू आउट भएकाे खेलमा सन्दीप र ललितबीच अन्तिम विकेटका लागि ४६ रनको साझेदारी भयाे । २८ ओभरमा नवौं विकेट गुमाएपछि ललित अन्तिम विकेटको रुपमा ४०.३ ओभरमा आउट भए ।
बलिङमा कतारका अमिर फारुकले ४ विकेट, ओइस अहमेदले ३ विकेट र मुनवीराले २ विकेट लिए ।
ब्याटिङमा कतारका जाहिर इब्राहिम र खुराम शाहजादले १५-१५ रन जोडे । ओपनर कमरान खानले ८ रन, इमाल लियानागेले ६ रन, इक्रामउल्लाह खान ५ रन, आमिर फारुक १४ र वलिद ३ रनमा आउट भए ।
सन्दीप प्लेयर अफ द म्याच
नेपालका स्पिनर सन्दीप एसिसी प्रिमियर कपमा कतारविरुद्ध प्लेयर अफ द म्याच घाेषित भए । कतारलाई ६८ रनले हराउँदै समूह विजेताको रुपमा सेमिफाइनलमा पुर्याउन अलराउन्ड प्रदर्शन गरेका सन्दीप खेलको प्लेयर अफ द म्याच चुनिएका हुन् ।
जारी प्रतियाेगितामा नेपालले पहिलो खेलमा मलेसिया र दोस्रो खेलमा ओमानलाई पराजित गर्दा नेपाल र साउदी अरेबियाबीचको तेस्रो खेल वर्षाका कारण रद्द हुँदै एक एक अंक बाँडेका थिए । एक अंक जोडेसँगै नेपाल अन्तिम खेलअघि नै सेमिफाइनलमा पुगेको थियो ।
जितसँगै नेपाल ४ खेलबाट ७ अंक जोड्दै समूह विजेता बन्दा समूहमा ६ अंक जोडेको ओमान उपविजेता बन्दै अन्तिम चारमा पुगेकाे छ । आगामी शनिबार नेपालले समूह 'बी' को उपविजेता कुवेतसँग सेमिफाइनल खेल्नेछ ।
0 प्रतिकृया