मोरङ, १५ बैशाख । कुनैपनि नागरिक गाँस बास र कपासबाट बञ्चित हुनुहुँदैन भन्ने सांसद डा. सुनिल शर्माले आफ्नो क्षेत्रका सुकुम्बासीलाई लालपुर्जा दिलाउन लागेका छन् ।

सुकुम्बासीलाई जग्गाधनी पूर्जा दिलाउने चुनाबी प्रतिबद्धता अनुसार डा. शर्माले आज जग्गा नापजाँच गर्ने सरकारी टोली लिएर मोरङको कानेपोखरी गाउँपालिका वडा नं. ६ पुगेका हुन् । सरकारी टोलीसँगै आफैं जग्गा नापजाँच गर्ने कार्यमा डा. शर्मा खटिए ।

डा. शर्मा सरकारी अमिनको टोलीसँगै वडा नं. ६ बिहिबारेका लालपुर्जा विहिन जनताका घरघर पुगेर जग्गा नाप्ने कार्यमा सहभागी भए । सोक्रममा डा. शर्मासँगै सरकारी अमिनको टोलीले सो क्षेत्रमा बर्षौंदेखि बसोबास गरेपनि लालपुर्जा नपाएकाहरुको जग्गाको विवरण संकलन पनि गरे ।

डा. शर्माले स्थानीय जनताहरुलाई चाँडोभन्दा चाँडो लालपुर्जा दिलाउन आफु सक्रिय रहेको बताए । साथै, सांसद शर्माले सरकारी टोलीलाई जनताले भोग चलन गरेको जग्गाजमिनको नापजाँच गरी तत्काल प्रक्रिया अगाडी बढाउन निर्देशन पनि दिए । ‘कुनैपनि नागरिक भूमिहिन बन्नु हुँदैन । आवश्यक प्रक्रियाहरु सक्दो चाँडो सक्नुहोला ।’ डा. शर्माले भने ।

सोक्रममा उनले स्थानीय जनताका समस्याहरु पनि सुने । विगत ६ वर्षयता लगातार आफ्नो क्षेत्रका जनतालाई घरदैलोमै निःशुल्क स्वास्थ्य सेवा पुर्याउँदै आएका सांसद डा. शर्माले आफु जनताको सेवा गर्नकै लागि राजनीतिमा लागेको बताए ।

सुकुम्बासी समस्या समाधान गर्ने, लालपुर्जा दिलाइदिने भन्दै विगतमा पटकपटक चुनाव जितेर गएकाहरु फर्केर नआएको तितो अनुभव बोकेका मोरङ क्षेत्र नं. ३ का जनताले गएको मंसिर ४ मा डा. शर्मालाई अत्याधिक मतका साथ संसदमा पठाएका थिए । डा. शर्माले चुनाब जितेको भोलीपल्टबाटै आफ्ना प्रतिबद्धता पुरा गर्न थालेकोमा उनीहरु सुकुम्बासी समस्या पनि समाधान हुनेमा विस्वस्त देखिएका छन् ।