सुनसरी, २० बैशाख । फरवार्ड माइक्रोफाइनान्स लघुवित्त वित्तीय संस्थाले सुनसरी दुहवीका एक ग्राहक सदस्यका परिवारलाई मृत्यु दावी बीमा रकम वितरण गरेको छ । फरवार्डले दुहवी नगरपालिका ५ बस्ने ग्राहक सदस्य हरेराम साहको दुर्घटनामा अकस्मात निधन भएपनि उनको परिवारलाई कर्जाको बीमा रकम हस्तान्तरण गरेको हो ।

बुधबार लघुवित्त अभियान्ता, पूर्वमन्त्री तथा सुनसरी क्षेत्र नं. ३ की संघीय सांसद भगबती चौधरीले स्वर्गीय साहकी श्रीमती नितु साहलाई ११ लाख २५ हजार हस्तान्तरण गर्दै दुहवीले सफल युवा व्यवसायी गुमाएको बताइन् । बीमा रकमको सदुपयोग गर्दै व्यवसाय र छोराछोरीका उचित शिक्षामा खर्च गर्न सुझाउँदै सांसद चौधरीले फरवार्डले उद्यमशीलता र ग्रामिण अर्थतन्त्रमा काम गरिरहेकोले आउँदा दिनहरुमा पनि सहकार्य गर्ने बताइन् ।

व्यवसायी साहले फरवार्डबाट ५ महिना अघि ५ लाख रुपैंया कर्जा लिएका थिए । फरवार्डले कर्जा प्रवाह गर्ने बेलामै कर्जाको बीमा समेत गर्ने गर्दछ । साहको ऋण लिएको चार महिना पछि सवारी दुर्घटनामा मृत्यु भएको थियो । उनको परिवारलाई कर्जाको डबल रकमसहित एक लाख १५ हजार क्रिया खर्च समेत दिइएको फरवार्ड माइक्रोफाइनान्सले जनाएको छ ।