एसपी यादव
काठमाडौं, २४ बैशाख । नवनियुक्त खानेपानी मन्त्री महिन्द्र राय यादवले जलसँग जीवन जोडिएकोले खानेपानीको शुद्धताको सवालमा कसैसँग कुनै प्रकारको सम्झौता नहुने बताएका छन् ।

खानेपानी मन्त्रालयकाे पदभार ग्रहण गर्दै मन्त्री यादवले संविधानले मौलिक हकको रुपमा स्वच्छ खानेपानी तथा सरसफाइमा पहुँच तथा स्वच्छ र स्वस्थ वातावरणमा बाँच्न पाउने हकको व्यवस्थालाई उच्च प्राथमिकता राखेर सामुहिक रुपमा काम गर्न मातहतका कर्मचारीहरुलाई निर्देशन समेत दिए ।

उक्त मौलिक हकको व्यवस्थालाई साकार पार्नमा कुनै कसर बाँकी नराख्ने उनले प्रतिबद्धता समेत जनाएका छन् । दिगो विकास लक्ष्य अन्तर्गत खानेपानी तथा सरसफाइको क्षेत्रलाई विषेश प्राथमिकतामा राखेर नेपाली जनतालाई सुरक्षित खानेपानी र सरसफाइको पहुँचमा ल्याउन आफु प्रतिबद्ध रहेको उनले बताए ।

पदभारसँगै नवनियुक्त मन्त्री यादवले "स्वच्छ नेपाल अभियान" लाई दिगो रुपमा सञ्चालन गर्नका लागि एउटा विशेष संयन्त्र गठन गर्न र छुट्टै सरसफाइ सम्बन्धि विशेष कोषको स्थापना र सोको कार्यान्वयनको फाइल पनि सदर गरेका छन् ।

२०७९ चैत १७ गतेको मन्त्रिपरिषद् विस्तारमा महिला, बालबालिका तथा ज्येष्ठ नागरिक मन्त्री भएका यादव आज संविधानको धारा ७६ को उपधारा (९) बमोजिम कार्यभार फेरिएर खानेपानी मन्त्रीमा नियुक्त भएका छन् ।