काठमाडाैं, २८ बैशाख ।  भुटानी शरणार्थी प्रकरणमा दोषीलाई छोड्ने र निर्दोषलाई फसाउने खेल भए त्यसकाविरूद्ध आफू र आफ्नो पार्टी दृढतापूर्वक उभिने नेकपा एमालेका अध्यक्ष केपी शर्मा ओलीले बताएका छन् ।

बिहीबारबाट सुरू भएकाे केन्द्रीय समितिको बैठकमा बाेल्दै अध्यक्ष ओलीले शरणार्थी प्रकरणमा निष्पक्ष छानविन हुनुपर्ने बताए । साथै, दोषीलाई छोडेर निर्दोषलाई फसाउने खेल भए आन्दोलन गर्ने चेतावनी दिँदै भने, ‘दोषीलाई छोड्न खोजियो भने दृढतापूर्वक त्यसको विरूद्ध उभिन्छौं । आन्दोलनमा उत्रिन्छौं ।

साथै, उनले निर्दोषलाई फसाउन खोजियो भने त्यसमा पनि एमालेकाे समर्थन नरहने बताउँदै निर्दोषलाई दोषी बनाउन खोज्नु अर्को अपराध हुने जिकीर गरे । सरकारी पक्ष कसलाई जोगाउने र कसलाई समात्ने भन्ने खेलमा लागेको बताउँदै ओलीले टोपबहादुर रायमाझी र उनका छोराविरूद्ध पक्राउ पुर्जी जारी हुँदा केही मानिसहरूले चम्कीचम्की वक्तव्यबाजी गरेको बताए ।

‘टोपबहादुर रायमाझी र उनका छोराविरूद्ध पक्राउ पुर्जी जारी हुँदा केही मानिसहरूले चम्कीचम्की वक्तव्यबाजी गरे, तर मैले संयमित भएर प्रधानमन्त्रीलाई नै भेटेर दोषी नउम्कियोस्, निदोर्ष नफसुन् भनेको थिएँ,’ ओलीले भने ।

अहिलेको परिस्थितमा यो विषय प्रधानमन्त्री र गृहमन्त्रीको हातमा नरहेको बताउँदै केही मान्छेहरू हिराे हुन खाेजिरहेकाे जिकीर गरे । ‘अहिले हिरो हुन खोजिराछन् कोही मान्छेहरू । म कुनै हालतमा छोड्दिनँ भन्छन्, उनका हातमा भएको भए हिजो यो मुद्दा चल्थ्यो ? मान्छे गिरफ्तार हुन्थे ?’

ओलीले प्रकरणमा जेठ ३० गते पक्राउ परेका व्यक्तिहरू छोडिनुको कारणबारे समेत अनुसन्धान हुनुपर्ने बताए । त्यतिबेला मुख्य अभियुक्त नै पक्राउ परेको र राजनीतिक दबाबमा छाडिएको विषय र अहिले घटनाको अनुसन्धानमा भइरहेको प्रगति हेर्दा अब भुटानी शरणार्थीको विषय सरकारको हातमा नरहेको पुष्टि हुने उनकाे भनाइ छ ।