सुनसरी, १३ जेठ । बालिकाहरुलाई सानै उमेरमा विवाह गरेर आफ्नो जिम्मेवारी पुरा गर्नु भन्दा पहिला उनीहरुको विकासकालागि शिक्षामा जोड दिनुपर्ने संघीय सांसद भगबती चाैधरीले बताएकी छन् । पूर्व महिला बालबालिका तथा ज्येष्ठ नागरिक मन्त्रीसमेत रहेकी सुनसरी क्षेत्र नम्बर ३ की सांसद चाैधरीले बालबालिकालाई सक्षम र याेग्य नागरिक बनाउन शिक्षामा पहुँच स्थापित गर्नैपर्ने जनाइन् ।

शुक्रबार गढी गाउँपालिका वडा नं. २ लाई बाल विवाह मुक्त वडा घाेषणा कार्यक्रममा बाेल्दै चाैधरीले कानुनी रुपमा बाल विवाह अपराध समेत भएकाे अभिभावकले बुझ्नुपर्ने बताइन् । ‘बाल विवाह कानुनी अपराध हाे । अभिभावकले छाेराछाेरीकाे भविष्य राम्राे बनाउन उचित शिक्षामा ध्यान दिनुपर्छ ।’ चाैधरीले भनिन् ।

सांसद हुनुभन्दा पहिलाबाटै गढी २ काे शिक्षामा सुधार र बालबालिकाको विकासलागि फरवार्ड नेपाल नामक संस्थाबाट विभिन्न सचेतना सञ्चालन गरेको स्मरण गर्दै चाैधरीले गढी २ लाई बाल विवाह मुक्त वडा घोषणा गर्न पाउँदा खुसी लागेको बताइन् ।

कोशी प्रदेशका सांसद रामदेव यादवले गढी २ मात्र नभएर पालिका र क्षेत्र र प्रदेश भर नै बाल विवाह मुक्त अभियान चलाइनु पर्ने बताए । प्रदेश सरकारले पनि बालबालिकाकाे शिक्षा र अभिभावककाे सचेतनाका लागि कार्यक्रमहरू बनाउने जनाए ।

साविक औराबनी गाविस हाल गढी २ लाई बाल विवाह मुक्त वडा घोषणा गरिएको वडाध्यक्ष प्रभाकर चौधरीले बताए । प्लान इन्टरनेश्नल नेपाल र साझा सवालका लागि साझा मञ्च (कोकन) सुनसरीले विगत लामोसमयदेखि बालबालिकाका क्षेत्रमा सचेतना मुलक कार्यक्रम सञ्चालन गर्दै आइरहेका थिए ।

घोषणा कार्यक्रममा गढिका समाजसेवी, शिक्षक, स्वयमसेविका र सामाजिक अभियन्ताहरुलाई प्रशंसा पत्र, मायाको चिनोसहित सम्मान गरिएको थियाे । कार्यक्रमममा गढी २ का सामुदायिक तथा निजी विद्यालयका सबै बालबालिकाको सहभागिता रहेको थियो ।साे अवसरमा बालबालिकाहरूले थारु, उराँव र नेपाली संस्कृति झल्कने नृत्यहरू प्रस्तुत गरेका थिए ।

बालविवाह मुक्त अभियानमा प्लान नेपाल, फरवार्ड नेपाल, साझा सवालका लागि साझा मञ्च, आसमान नेपाल, पिपुल इन निड, महिला फेडरेशन, ओरेक नेपाल, शान्ति र समृद्धिका लागि युवा सुनसरी, बाल अधिकार समिति गढी गापा, किसोरी सञ्जाल, बाल सञ्जाल, दुरदृष्टि विकास समाज केन्द्र, प्रहरी कार्यालय औरावनी, साझा नेपाल, सामुदायिक सचेतना नेपाल, ज्योति महिला फेडरेशन, सिएडिसी, आरएसडिसी र भ्वाइस अफ चिल्ड्रेन नेपालको सहकार्य रहेको थियो ।