काठमाडाैं, १५ जेठ । रुकुमको चौरजहारीमा जन्मेका सुवोध गौतमले फिनल्यान्डको ओलु विश्वविद्यालयबाट ‘अक्सिग्लुतारेट’ रोगसम्बन्धी विषयमा विद्यावारिधि गरेर वैज्ञानिक भएका छन् । उनी अत्यन्तै दुर्लभ विषयमा विद्यावारिधि गरेर वैज्ञानिक बनेका हुन् ।

गौतमले पाँच वर्षसम्म उक्त विश्वविद्यालयकी प्राध्यापक मिल्लिहार्जु, रुड बान्क र माट्स पाउल्सनको समुहमा रहेर गरेको ‘जैविक गतिविधिमा इन्जाइमको विविध भूमिकाले प्राणवायुमा पार्ने असर र त्यसबाट मस्तिष्कको रक्त प्रवाहमा हुने अवरोध– ‘ब्लड ब्रैन ब्यारियर बीबीबी’ बारेमा गरेको गहन खोजको सफलतापछि विद्यावारिधिको उपाधि पाएका हुन् ।

गौतमले ‘डिजिज एसोसियटेड रोल्स अफ टु अक्सोग्लुटरेट डिपेन्डेन्ट डाइअक्सिजेनेसेस ट्रान्समेम्बरेन पि फोर एच एन्ड लिसिल हाइड्रिक्सिलेस थ्री’ विषयमा लेखेका महत्वपूर्ण तीन विधाका अनुसन्धनात्मक लेख विश्वप्रसिद्ध वैज्ञानिक जर्नलहरूमा प्रकाशित भइसकेका छन् ।

विश्वविद्यालयको छनौट समितिले छानेको जर्मनीका ड्रेसदेन विश्वविद्यालयका प्राध्यापक डा. बेन बिलक्सले गौतमको अनुसन्धानपत्रमा गरेको प्रत्यक्ष प्रश्नोत्तर र सार्वजनिक सुनुवाइपछि विश्वविद्यालयले उनलाई उक्त उपाधि प्रदान गरेको हो ।

विश्वविद्यालयको लिना पालोट्ति सभाहलमा भएको सार्वजनिक सुनुवाइमा अनुसन्धानमा संलग्न ब्यक्तिहरू, प्राध्यापकहरू र विद्यार्थीहरू प्रत्यक्ष सहभागी थिए भने भर्चुअल माध्यमबाट पनि गौतमको अनुसन्धानका बारेमा चासो राख्नेहरू जोडिएका थिए । कोरियाको चुङनाम राष्ट्रिय विश्वविद्यालयबाट स्नात्तकोत्तर गरेका गौतम हाल ओलु विश्वविद्यालयमै अनुसन्धान क्षेत्रमा काम गरिरहेका छन् ।

ओलु विश्वविद्यालय फिनल्याण्डको सबैभन्दा ठूलो विश्वविद्यालय हो, जुन ओलु शहरमा छ । यो जुलाई ८, १९५८ मा स्थापित भएको हाे । विश्वविद्यालयमा करिब १३ हजार विद्यार्थीहरू अध्ययनरत छन् भने, दुई हजार नौ सय कर्मचारीहरू छन् । विश्वभरबाट २१ अन्तर्राष्ट्रिय मास्टर कार्यक्रमसमेत उक्त विश्वविद्यालयमा प्रस्तावित छन् ।

ओलु विश्वविद्यालय अझै पनि विश्वव्यापी विश्वविद्यालयहरूको शीर्ष तीन प्रतिशतभित्र पर्दछ । फिनल्याण्डमा अध्ययन गर्न तथा काम गर्न चाहने राष्ट्रिय तथा अन्तर्राष्ट्रिय विद्यार्थीहरूको लागि लोकप्रिय विश्वविद्यालय हाे ।