मंगलबार भएको फाइनलमा घरेलु टोली मलेसियालाई २२१ रनले हराउँदै नेपालले उपाधिमाथि ह्याट्रक गरेकाे हो ।

काठमाडौं, १९ असार । नेपालले एसीसी यू–१६ इस्ट जोन कपको उपाधि जितेको छ । मंगलबार भएको फाइनलमा घरेलु टोली मलेसियालाई २२१ रनले हराउँदै नेपालले उपाधिमाथि ह्याट्रक गरेकाे हो ।

यसअघि नेपालले २०१७ र २०१९ मा पनि यू १६ को उपाधि जितेको थियो । यसअघिका दुई संस्करण यू१६ रिजनको नामले थिए । नेपालले दिएको २५३ रनको लक्ष्य पछ्याएको मलेसिया १४.५ ओभरमा मात्र ३१ रन बनाएर आउट भयो  । नेपालका अभिषेक तिवारीले ५ तथा सन्तोष यादवले ३ विकेट लिए ।

त्यसअघि टस जितेर पहिले ब्याटिङ गरेको नेपालले ८ विकेटको क्षतिमा पूरै ३५ ओभर खेल्दै २५२ रन बनाएको थियो । नेपालका लागि नरेन भट्टले ८९ बलमा अविजित ११२ रन जोडेका थिए ।

निरजकुमार यादवले ४७, सन्तोष यादवले २६,  सूर्यांशु कोइरालाले १८, अशोक धामीले ११, दिपु कुमारले ५, क्याप्टेन अभिशेक तिवारीले ४, आशिष लुहारले २ र प्रतिक भट्टराईले एक रन बनाएका थिए ।

मलेसियाका लागि मोहम्मद अक्रमले १० रन बनाउँदा अन्य कुनैपनि ब्याटरले दोहोरो अंक बनाउन सकेनन् । मलेसियाका मोहम्मद अकरमले तीन तथा हजिक हाइकल, अरिन अक्ल र मुहम्मद फथुल मुइनले समान एक/एक विकेट लिए ।