काठमाडाैं, २९ साउन । नेकपा एमालेले भदाै १६ देखि असाेज मसान्तसम्म  प्रदेश अधिवेशनकाे मिति ताेकेकाे छ । आज सोमबार बसेको एमाले सचिवालय बैठकले सात प्रदेश र उपत्यका विशेष कमिटीकाे अधिवेशनकाे मिति ताेकेकाे पार्टीका उपमहासचिव प्रदीप ज्ञवालीले जानकारी दिए ।

पार्टीले भदौ १६ र १७ गते लुम्बिनी प्रदेश, असोज ५ र ६ गते मधेस प्रदेश, ८ र ९ गते बाग्मती प्रदेशकाे अधिवेशन गर्नेछ । त्यस्तै असाेज, १० र ११ गते कर्णाली प्रदेश, १२ र १३ गते कोशी प्रदेश, १५ र १६ गते गण्डकी प्रदेश, १९ र २० गते उपत्यका विशेष र २१ र २२ गते सुदूरपश्चिम प्रदेशकाे अधिवेशन गर्ने निर्णय गरेकाे उपमहासचिव ज्ञवालीले जानकारी दिए ।

पार्टीले अधिवेशनका लागि प्रतिनिधि चयन पालिकाबाट हुने र ४० वर्षमुनिका युवालाई प्रतिनिधि बनाउनुपर्ने कुरामा ध्यान दिनुपर्ने ज्ञवालीले जनाए । वडा र टोलमा ४० वर्षमुनिका कम्तीमा एक तिहाइ युवाहरू अनिवार्य समावेश हुनुपर्ने, पालिकामा अनिवार्य २० प्रतिशत, जिल्लामा १५ र प्रदेशमा १० प्रतिशत अनिवार्य युवाहरू रहनुपर्ने भनिएकाे छ ।

त्यस्तै बैठकले केन्द्रीय कमिटीको सदस्यको रूपमा केदार न्यौपाने र छक्कबहादुर लामालाई मनोनयन गरेको छ । सुदूरपश्चिम प्रदेशमा शंकरदत्त जोशी र बाग्मती प्रदेशका सूर्य शर्मालाई केन्द्रीय सल्लाहकार परिषदमा ल्याउने निर्णय पनि पार्टीले गरेको छ ।

उपमहासचिव ज्ञवालीले सुन तस्करी प्रकरणमा छानबिन गर्न सरकारले ढिलो गर्नुले उसकाे संलग्नता पुष्टि भएको दाबी गर्दै सुन तस्करी प्रकरणको छानबिनका लागि उच्चस्तरीय समिति बन्नु अनिवार्य रहेको बताए । सरकारले सुन तस्करी प्रकरणमा अनुसन्धान ढिलाइ गर्नुले प्रमाणहरू नष्ट हुँदै जाने ज्ञवालीकाे तर्क छ ।

उच्चस्तरीय छानबिन न्यायिक समिति बनाई जरैसम्म अनुसन्धान नभए अन्तर्राष्ट्रियस्तरमा नेपालको छवि नराम्रो हुनुका साथै नेपालको भूराजनीतिमा समेत असर पर्ने उनकाे भनाइ छ ।