काठमाडाैं, १८ भदाै । मुलुकको गरिबी निवारणका लागि फरवार्ड माइक्रोफाइनान्स लघुवित्त वित्तीय संस्था लिमिटेडले विशेष भूमिका खेलेको संस्थाकी संस्थापक अध्यक्ष भगबती चौधरीले बताउनु भएकाे छ । काठमाडौंमा भएको एक कार्यक्रममा बाेल्दै संस्थापक अध्यक्ष चौधरीले मुलुककाे गरिबी निवारणमा टेवा पुर्याउनुका साथै महिलाहरूमा वित्तीय पहुँच पुर्याएर उनीहरूलाई स्वाबलम्बी समेत बनाएकाे बताउनु भयाे ।

मुलुकको गरिबी, अशिक्षा, स्वास्थ्य सचेतनाका क्षेत्रमा आफुले सक्दो प्रयास गरेको चौधरीको भनाई छ । गरिबी निवारणका लागि लघुवित्तका माध्यमबाट ग्रामिण महिला दिदिबहिनीहरुलाई वित्तिय क्षेत्रमा जोड्न सफल भएको उनको भनाई छ । लघुवित्तकै कारण ग्रामिण महिला दिदीबहिनीहरुको जीवन सहज भएको उनको दावी छ ।

‘लघुवित्त कार्यक्रमबाट महिलाहरुले जीवीकोपार्जनदेखि परिवारको हरेक सपना पुरा गरेका छन् । छाेराछाेरीहरूलाई राम्राे स्कुलमा पढाएका छन् । घरजग्गा, सम्पत्ति जाेडेका छन् । ग्रामिण अर्थतन्त्रकाे मेरूदण्ड नै हाे लघुवित्त कार्यक्रम ।’ प्रतिनिधि सभा सदस्य समेत रहेकी चाैधरीले भन्नुभयाे । लघुवित्तको मूल उद्देश्य भनेकै गरिबीको अन्त्य सँगै महिलाहरुलाई उद्यमी बनाउनु रहेको चौधरीको भनाई छ ।

लघुवित्त कार्यक्रममा जाेडिएर नै महिलाहरूमा वित्तीय साक्षरता बढेकाे र उनीहरू उद्यमी बनेर सुखी र खुसी जीवन व्यतित गर्न सफल भएकाे अध्यक्ष चौधरीको भनाई छ । ‘विना धितो लघुवित्त क्षेत्रले महिला दिदीबहिनीहरुलाई कर्जा प्रवाह गर्दा गरिखान सहज भएको छ, छाेराछाेरीहरूलाई राम्रा स्कुलमा पढाएका छन् । श्रीमानकाे कमाइमा मात्र भर पर्नु परेकाे छैन । साथै, महिला स्वराेजगार भएकैले कतिपय घरेलु हिंसा समेत कम भइरहेका छन् ।’ चाैधरीले भन्नुभयाे ।

लघुवित्तको महत्व बुझि यसका खराब पक्ष हटाउन सबै पक्ष लाग्नुपर्नेमा चाैधरीले जाेड दिनुभयाे । पछिल्लो समय लघुवित्तका सन्दर्भमा नकारात्मक विषयहरू बढी आएको र यसलाई नियन्त्रण गर्न आफनो दायीत्व रहेको उनको भनाई छ । चौधरीले लघुवित्तको ऋण तिर्नुपर्दैन भन्ने भ्रम हटाउन आग्रह समेत गर्नुभयाे ।

‘लघुवित्तबाट कर्जा लिएपछि तिर्नुपर्दैन भन्ने भ्रममा नपराै, लघुवित्त संस्थाहरूमा आम सर्वसाधारणले एक एक पैसा बचत गर्नुभएकाे छ । ऋण नतिर्दा ती सदस्यहरूकाे बचत पनि जाेखिममा पर्दछ ।’लघुवित्त सबैको साझा संस्था भएकोले यसको सदुपयोग गर्न चाैधरीले आग्रह गर्नु भएकाे छ ।