काठमाडौं, ६ असोज । १९औँ एशियाली खेलकुद प्रतियोगिताको औपचारिक उद्घाटन आज हुँदैछ । चीनको हाङ्झाउमा आजदेखि असोज २१ गतेसम्म आयोजना गरिएको एसियाली खेलकुद प्रतियोगितामा विश्वका ४५ देशको सहभागिता हुनेछ ।

प्रतियोगिताको उद्घाटन समारोहमा प्रधानमन्त्री पुष्पकमल दाहाल ‘प्रचण्ड’ले पनि सहभागिता जनाउँने कार्यक्रम छ । प्रधानमन्त्री अमेरिकाको न्युयोर्कमा भएको संयुक्त राष्ट्रसंघको ७८ औँ महासभामा सहभागी भएर त्यतैबाट चीन गएका छन् ।

प्रतियोगितामा पहिलाे पटक सबैभन्दा धेरै खेलाडीले सहभागिता जनाउँदैछन् । नेपालको तर्फबाट २९ खेलमा १२७ जना महिला र १२६ जना पुरुष गरी २५३ जना खेलाडीले प्रतिस्पर्धा गर्नेछन् । त्यसाे त, यो एशियाडमा इतिहासकै धेरै खेलाडीहरुले पनि सहभागीता जनाउदै छन् ।

१९ औं एसियाली खेलकुद उद्घाटन समारोहमा हुने मार्चपासमा एसियाली स्वर्णपदक धारीद्वय निमा घर्तीमगर र वीरबहादुर महराले नेपालको झन्डा बोक्ने छन् । निमाले पछिल्लो दुई संस्करणको दक्षिण एसियाली खेलकुद सागमा स्वर्ण पदक जितेका छन् भने, वीरबहादुरले पछिल्लो सागमा स्वर्ण जितेका छन् ।

नेपाली समय अनुसार आज राती पौने ८ बजे सुरु हुने उद्घाटन समारोह हाङ्झाउ ओलम्पिक सेन्टरमा दुइ घण्टा चल्नेछ । उद्घाटन समारोह सुरु नहुँदै पुरुष भलिबल, टेबल टेनिस र महिला फुटबल सुरु भइसकेका छन् ।