धरान, १५ मंसिर । धरानस्थित डिपो स्कुलको आयोजनामा शुक्रबारदेखि सुरु भएको १८ औं ललित अम्वर डिपो कपको उद्धघाटन खेलमा हिमशिखर स्कुल तरहरा विजयी भएको छ ।अत्यन्त्य प्रतिस्पर्धात्मक खेलमा हिमशिखरले आयोजक डिपो स्कुललाई १–० गोल अन्तरले पराजित गर्दै अगाडि बढेको हाे ।

खेलमा पहिलो हाफको १८ औं मिनेटमा हिमशिखरका मन्जिल श्रेष्ठले गोल गर्दै टिमलाई अग्रता दिलाएका थिए । त्यसपछि निर्धारित समयसम्म दुबै तर्फ कुनै गोल हुन सकेन । खेलको म्यान अफ द म्याच डिपो स्कुलका स्पन्दन राई घोषित भए । डिपो कपको पहिलो चरणमा पराजित टिमले दिल बहादुर प्लेट च्याम्पियन प्रतियोगिता खेल्नेछ ।

प्रतियोगिताका विजेताले नगद ११ हजार १ सय ११ रुपैंया, उपविजेताले ७ हजार १ सय ११ र तेस्रो हुनेले ५ हजार १ सय ११ रुपैंया, ट्रफि, मेडल र प्रमाणपत्र प्राप्त गर्नेछन् । यसै गरि प्रतियोगिताको उत्कृष्ट खेलाडी, हाइस्कोरर र प्रत्येक खेलका म्यान अफ द म्याचले ट्रफि र प्रमाणपत्र प्राप्त गर्नेछन् ।

जिल्ला स्तरिय प्रतियोगितामा याे पटक धरानका १२ र धरान वाहिरका ४  गरी १६ विद्यालयले सहभागिता जनाएका छन् । मंसिर २२ गते सम्म चल्ने प्रतियाेगिताकाे उद्धघाटन एन्फा कोशी प्रदेश अध्यक्ष किशोर राईले गरेका थिए ।