विराटनगर । मोरङ क्षेत्र नं. ३ बाट संघीय संसदमा प्रतिनिधित्व गर्ने नेपाली कांग्रेसका सांसद डाक्टर सुनिलकुमार शर्मा स्वास्थ्यकर्मीहरुको टोलीसहित प्यूठान पुगेका छन् । गाउँगाउँमा सर्वसुलभ रुपमा स्वास्थ्य सेवा पुर्याउने अभियानमा सक्रिय नेपाली कांग्रेसका प्रभावशाली सांसद डा.शर्मा स्वास्थ्यकर्मी र उपकरण सहित प्यूठानको गौमुखी गाउँपालिका पुगेका हुन् ।

प्यूठानको गौमुखी गाउँपालिका वडा नं. ५ ठूलाबेसीमा आयोजित निःशुल्क स्वास्थ्य शिविरमा ११२३ जना सर्वसाधारणको स्वास्थ्य जाँच गरिएको छ । शिविरमा ४९ जनाको इसिजी, २०३ जनाको ल्याब परीक्षण, १५८ जनाको भिडियो एक्सरे र ७६ जनाको इको समेत गरिएको काठमाडौं मेडिकल कलेजका जनरल मेनेजर नारायण दाहालले जानकारी दिए । शिविरमा आएका मध्ये ९२ जनाको दाँत खोलिएको थियो भने, ४० जनालाई थप उपचारका लागि ओ.टी. रेफर गरिएको थियो ।

शिविरमा महिला, बालबालिका, ज्येष्ठ नागरिक तथा गरिब विपन्नले स्वास्थ्य जाँच गराएका थिए । गाउँमै राजधानीबाट विशेषज्ञ चिकित्सकहरुको टोली सहितको स्वास्थ्य शिविर आएपछि स्वास्थ्य जाँच गराउन बिरामीको घुईंचो नै लागेको थियो ।

निःशुल्क स्वास्थ्य शिविरको प्रमुख अतिथी संघीय सांसदले स्वास्थ्य शिविरलाई संवोधन गर्दै दुरदराजमा रहेका जनतालाई घरदैलोमै स्वास्थ्य सेवा प्रवाह गर्न आफु प्रतिबद्ध रहेको बताए । राजनीतिक रुपमा मोरङ क्षेत्र नं. ३ बाट संघीय संसदमा प्रतिनिधित्व गरेतापनि जनताको सेवा गर्न आफुलाई भूगोलले नरोक्ने बताउँदै स्वास्थ्य शिविरबाट अपरेशन गर्न काठमाडौं मेडिकल कलेजमा आउने बिरामीलाई शतप्रतिशत छुट गरिने घोषणा गरे । ‘यहाँ स्वास्थ्य जाँच गराएर अपरेशन गर्नुपर्ने बिरामीहरु काठमाडौं मेडिकल कलेज, काठमाडौं आउँदा उहाँहरुलाई शतप्रतिशत छुटको व्यवस्था गर्नेछु ।’ सांसद शर्माले भने ।

कार्यक्रममा प्रदेश सांसद निमा गिरीले समेत संघीय सांसद डा. शर्माले गरेको समाजसेवा र स्वास्थ्य सेवालाई मुक्तकण्ठले प्रसंशा गरिन् । डा. शर्माले स्वास्थ्य क्षेत्रमार्फत समाजसेवा मात्र नगरी राज्यले गर्ने दायित्व समेत वहन गरिरहेको सांसद गिरीको भनाई छ ।

निःशुल्क स्वास्थ्य शिविरमा डा. शर्मासहित ५५ जनाको टोली रहेको छ । टोलीले अब पुस ५ गते दाङ्ग तथा ६ गते कपिलवस्तुमा समेत निःशुल्क स्वास्थ्य शिविर सञ्चालन गर्ने कार्यक्रम रहेको छ ।