काठमाडौं । आजबाट चौंथो राष्ट्रिय लघुवित्त सदस्य सम्मेलन हुँदैछ ।  लघुवित्त क्षेत्रमा देखिएका समस्या र चुनौतीबारे छलफल गर्दै रणनीति बनाउन फागुन ५ र ६ गते काठमाडौंमा सम्मेलन स्वावलम्बन विकास केन्द्र र नेपाल आर्थिक पत्रकार समाज(सेजन)को संयुक्त आयोजनामा हुन लागेको हो ।

सम्मेलनको प्रधानमन्त्री पुष्पकमल दाहालले उद्घाटन गर्नेछन् । लघुवित्त क्षेत्रमा पछिल्लो समय देखिएका समस्यालाई पहिचान गर्दै निराकरण गर्ने उद्देश्य सहित सम्मेलन आयोजना गरिएको केन्द्रका अध्यक्ष शंकरमान श्रेष्ठले बताएका छन् ।

सम्मेलनमा नियामक, नीतिगत र सरकारी निकायका प्रतिनिधिहरु, लघुवित्त संस्थाका नेतृत्वकर्ता, सञ्चालक, लघुवित्तकर्मी, सेवाग्राही सदस्य, जनप्रतिनिधि गरी ७ सय जनाभन्दा बढीको सहभागिता रहनेछ ।

‘नेपालमा बिगत १०–१२ वर्षहरु लघुवित्त क्षेत्रका लागि सुनौला दिन रहेपनि लघुवित्त क्षेत्रको पुनर्संरचना र पुनर्जागरण गर्नुपर्ने आवश्यक्ता देखिएको छ, त्यसका लागि सम्मेलन प्रभावकारी बन्ने अपेक्षा गरेका छौं ।’ अध्यक्ष श्रेष्ठले भने ।

सम्मेलनको नारा नै स्वस्थ लघुवित्त, समृद्ध सदस्य राखिएको छ । विश्वका १७८ ओटा देशमा सञ्चालन भइरहेको लघुवित्त मोडल ग्रामीण अर्थतन्त्रको पुनर्संरचनाका लागि उपयुक्त रहेको श्रेष्ठको दावी छ । पछिल्लो समय देखिएका केही विकृतीले गर्दा नेपालमा लघुवित्त सेवा बदनाम हुन थालेको भन्दै यसलाई सुधार गर्न जरुरी देखिएको आयाेजककाे निष्कर्ष छ ।

लघुवित्त संस्थाहरुले वित्तीय सेवासँगै शिक्षा, तालिम, सामाजिक कामहरु गर्नुपर्नेमा आफ्नो भूमिका बिर्सिदै गएको श्रेष्ठले जिकीर गरे । लघुवित्तले बढी ब्याज लिएको गुनासो सुनिए पनि यो ब्याजदर दक्षिण एसियामै न्यून रहेको उनको तर्क छ ।

लघुवित्त वित्तीय संस्थाहरु र लघुवित्त गर्ने सहकारी संस्थाहरुले नेपालको ७७ वटै जिल्लामा पुगेर लघुवित्त सेवा प्रदान गरी रहेका छन् । हाल ५७ वटा लघुवित्त संस्थाहरुले ५ हजार ८२ शाखाहरूमार्फत् करिब ६० लाख जनतालाई लघुवित्तमा आवद्ध गरेका छन् ।

यसमध्ये २८ लाख सदस्यहरुले लघुवित्त गर्ने संस्थाबाट ऋण लिएर व्यवसाय गरी रहेका छन् । लघुवित्त गर्ने संस्थाहरुले ४ खर्ब ३२ अर्ब रूपैयाँभन्दा बढी कर्जा लगानी पनि गरेका छन् । लघुवित्त बाहेक ५० वटा जति लघुवित्त सञ्चालन गर्ने सहकारी संस्थाहरु पनि क्रियाशील रहेका छन् ।