काठमाडौं । नेपाली कांग्रेसका सांसद डाक्टर सुनिलकुमार शर्माद्वारा सञ्चालित निःशुल्क स्वास्थ्य शिविरबाट ५४१ बिरामी लाभान्वित भएका छन् । सांसद शर्माको स्वास्थ्य टोलीले काठमाडौंको बुढानिलकण्ठ नगरपालिका १०, कपनमा सञ्चालन गरेको निःशुल्क स्वास्थ्य शिविरमा ५४१ जना बिरामीले स्वास्थ्य जाँच गराए । 

स्वास्थ्य शिविर सांसद शर्माले काठमाडौं मेडिकल कलेजले न्यूसे क्राफ्टसँगको सहकार्यमा सञ्चालन गर्नुभएको हो । शिविरमा आएका मध्ये ७५ जनाको इसिजी, ८८ जनाको ल्याब परीक्षण, ९७ जनाको भिडियो एक्सरे गरिएको काठमाडौं मेडिकल कलेजका अस्पताल प्रबन्धक तथा प्रमुख प्रशासकीय अधिकृत नारायण दाहालले जानकारी दिए । शिविरमा २२ जनाको दाँत खोलिएको थियो भने, २७ जनालाई थप उपचारका लागि ओ.टी. रेफर गरिएको थियो । 

सांसद शर्माले आम नागरिकलाई सर्वसुलभ रुपमा स्वास्थ्य सेवा प्रदान गर्न देशव्यापी रुपमा निःशुल्क स्वास्थ्य शिविर चलाउँदै आइरहनुभएको छ । शिविरबाट मुख्य रुपमा महिला, बालबालिका, ज्येष्ठ नागरिक, गरिब, असहायहरुले फाइदा लिइरहेका छन् । शिविरमा केएमसीका विशेषज्ञ डाक्टरहरुले नाक कान घाँटी, आँखा रोग, दन्त रोग, बाल रोग, स्त्री तथा प्रसुति, जनरल मेडिसिन, नसा तथा हाडजोर्नी सम्बन्धी सेवाहरु दिने गरेका छन् ।