काठमाडौं । नेपाली कांग्रेसका सांसद डा. सुनीलकुमार शर्मा नेतृत्वकाे काठमाडौं मेडिकल कलेज (केएमसी) मा सफलतापूर्वक दुर्लभ शल्यक्रिया गरिएकाे छ । केएमसीका वरिष्ट न्यूराे सर्जन प्रा.डा. अमित थापा नेतृत्वले सिराहाकी ६८ वर्षीया महिलाकाे मस्तिष्कमा रहेकाे दोहोरो एन्युरिज्मको दुर्लभ र जटिल शल्यक्रिया सफलतापूर्वक गरेकाे हाे । 

केएमसीका प्रबन्धक एवं प्रमुख प्रशासकीय अधिकृत नारायणप्रसाद दाहालका अनुसार सिराहाकी ६८ वर्षीया उषा दमाईलाई मस्तिष्कमा दोहोरो एन्युरिज्मले गम्भिर समस्या उत्पन्न भएको थियो । एन्युरिज्मकै कारण उनकाे मस्तिष्कमा गम्भिर रक्तश्वाव भएपछि छोरीले साउन ३१ गते तत्काल उपचारका लागि केएमसीमा ल्याएकी थिइन् । 'यहाँ ल्याइपुर्याउँदा उहाँकाे अवस्था अत्यन्त नाजूक थियाे । रक्तश्राव भएकाे थियाे । तत्कालै हाम्राे विशेषज्ञ चिकित्सक टोलीले मस्तिष्कको सानो भागमा शल्यक्रिया गरेर दुवै एन्युरिज्मलाई सफलतापूर्वक बाँध्न सफल भएपछि उहाँकाे ज्यान बच्याे ।' केएमसीका प्रबन्धक एवम् प्रमुख प्रशासकीय अधिकृत दाहालले बताए । 

केएमसीकाे अत्याधुनिक प्रविधि सहित दक्ष चिकित्सकबाट मस्तिष्ककाे शल्यक्रिया पश्चात केही घण्टा पछि नै बिरामी उषा दमाईले स्वास्थ्य लाभ पाउनुभएकाे थियाे । उहाँकाे रक्तस्रावको कारण मस्तिष्कको तरल निकासी प्रणाली अवरुद्ध भएकोमा त्यसलाई पनि समाधान गर्न एक हप्तापछि स्थायी जल निकासी प्रणालीको स्थापना गरिएकाे थियाे । 

हाल बिरामीको स्वास्थ्यमा उल्लेखनीय सुधार आएको र उहाँ स्वतन्त्र रूपमा खाना खान र दैनिक गतिविधिहरू गर्न सक्षम भइसकेकाे केएमसीले जनाएकाे छ । 'केएमसीमा ल्याइपुर्याउँदा नै उहाँकाे स्वास्थ्यवस्था गम्भिर भइसकेकाे थियाे । हामीले तत्कालै शल्यक्रिया गर्याैं । अहिले उहाँकाे स्वास्थ्यमा उल्लेखनीय सुधार भइसकेकाे छ । हामी उहाँको शीघ्र र पूर्ण स्वास्थ्य लाभको कामना गर्दछौँ ।'  प्रा.डा. थापाले भन्नुभयाे । 

यता बिरामीका छोरी र ज्वाइँले केएमसीले अपनाएकाे नविनतम स्वास्थ्य प्रविधि र दक्ष चिकित्सककै कारण आमाकाे ज्यान बचेकाे बताउनु भयाे । 'आमालाई ज्युँदो लिएर जान पाउने होइन कि भन्ने त्रास थियाे । यहाँका चिकित्सकहरूले आमालाई बचाउन ठूलाे भूमिका खेल्नुभयाे त्यसका लागि ह्दयदेखि नै धन्यवाद दिन्छाैं ।'

केएमसीले पछिल्लाे समय स्वास्थ्य सेवा तर्फ ठूलाे फड्काे मार्दै गइरहेकाे छ । स्वास्थ्य क्षेत्रमा पछिल्लाे समय भित्रिएका नविनतम उपलब्धिहरू भित्रर्याउँदै केएमसीले वरिष्ट र अनुभवी चिकित्सकहरूकाे व्यवस्थापन गरेकाे छ । केएमसीलाई अत्याधुनिक बनाउन नेपाली कांग्रेसका प्रभावशाली सांसद समेत रहेका डा. सुनिलकुमार शर्माले महत्वपूर्ण भूमिका निर्वाह  गर्नुभएकाे छ ।