काठमाडौं । नेपाली कांग्रेसका सांसद डाक्टर सुनिलकुमार शर्माको निःशुल्क स्वास्थ्य शिविर दोलखाको विगु गाउँपालिकामा सम्पन्न भएको छ । कारितास नेपालको आयोजनामा विगु, सिँगटीमा सञ्चालित शिविरबाट ६ सय ३ जना बिरामी लाभान्वित भएका छन् । 

शिविरमा ७७ जनाको इसिजी, ११३ जनाको भिडियो एक्सरे, ८७ जनाको ल्याब परीक्षण गरिएको काठमाडौं मेडिकल कलेजका प्रबन्धक तथा प्रमुख प्रशासकीय अधिकृत नारायण दाहालले जानकारी दिनुभयो । दाहालका अनुसार शिविरमा ४३ जनाको दाँत समेत निकालिएको थियो भने, थप उपचारका लागि ३७ जनालाई रेफर गरिएको थियो । 

शिविरमा केएमसीका चिकित्सकहरुले स्वास्थ्य जाँच गरेका थिए । शिविरमा नाक कान घाँटी, आँखा रोग, दन्त रोग, स्त्री रोग, जनरल मेडिसिन, बाल रोग, नसा तथा हाडजोर्नी सम्बन्धी सेवाहरु दिइएको थियो । 

दुरदराजमा रहेका नागरिकलाई घरआँगनमै निःशुल्क स्वास्थ्य सेवा प्रदान गर्ने उद्देश्यले सांसद सुनिल शर्माले निःशुल्क स्वास्थ्य शिविर चलाउनु भएको हो । शिविरबाट महिला, बालबालिका, ज्येष्ठ नागरिक, गरिब, विपन्न नागरिक लाभान्वित भइरहेका छन् ।