६ फागुन २०८१, मङ्गलवार
६ फागुन २०८१, मङ्गलवार
‘महाधिवेशन २०८१ भित्रै हुनुपर्छ, किन्तु परन्तु भन्न पाइँदैन’ डा.शेखर
एक्सन खबर
धनगढी । नेपाली कांग्रेसका वरिष्ठ नेता डा. शेखर कोइरालाले नेपाली कांग्रेसको १५ औं महाधिवेशन २०८२ सालभित्रै हुनुपर्ने बताएका छन् । आफूले युग सुहाउँदो कांग्रेस बनाउने दाबी गरेका उनले पार्टीकाे महाधिवेशन विधान अनुरूप हुनुपर्ने भन्दै किन्तु परन्तु भनेर महाधिवेशन सार्न नपाइने पनि बताएका छन् ।
सुदूरपश्चिम प्रदेशको भ्रमणमा रहेका काेइरालाले नेपाल प्रजातान्त्रिक सेनानी संघ, सुदूरपश्चिम प्रदेशको प्रथम अधिवेशनलाई सम्बोधन गर्दै भने, ‘अबको कांग्रेस बलियो र गतिशील हुनुपर्छ । त्यसका लागि १५ औं महाधिवेशन २०८२ भित्रै हुनुपर्छ । पार्टीको विधान अनुसार महाधिवेशन हुनुपर्छ । यसमा किन्तु परन्तु भन्न पाइदैन ।’
महाधिवेशनले पार्टीलाई नयाँ जीवन दिने, नयाँ कार्यदिशा तय गर्ने भएकाले महाधिवेशन बेलैमा हुनुपर्नेमा डा. शेखरकाे जोड छ । नेपाली कांग्रेसलाई जोगाउन तथा लोकतन्त्रको सुढृढीकरण गर्नको लागि पनि महाधिवेशनको आवश्यक रहेको उनकाे तर्क छ ।
पार्टीमा एकता नभएको भन्दै उनले पार्टीलाई एक ढिक्का बनाएर लैजानु अहिलेको आवश्यकता रहेकाले त्यसको लागि प्रजातन्त्र सेनानी सहित जिल्लाका सबै साथीहरुले पहल गर्नु पर्ने बताए । अहिले कांग्रेसभित्रको एकता, सौहार्दता तथा स्वच्छ प्रतिस्पर्धा हराउँदै गइरहेको भन्दै उनले बिस्तारै नेपाली कांग्रेस कम्युनिस्ट पार्टी जस्तो बन्दै गइरहेकोमा आफू चिन्तित रहेको बताए ।
डा. कोइरालाले पार्टीभित्र कसैलाई अन्याय हुन नदिने भन्दै कार्यकर्तालाई आवश्वस्त हुन भनेका थिए । अब पार्टीभित्र न्याय हुने र त्यसको जिम्मा आफूले लिने उनकाे भनाइ छ । उनले नेपालमा प्रजातन्त्र तथा लोकतन्त्रको स्थापनfका लागि प्रजातान्त्रिक सेनानीको भूमिका महत्वपूर्ण रहेकाले पार्टीले त्यागको आधारमा सम्मान गर्नुपर्ने बताए । ‘विगतमा पार्टीभित्र लोकतान्त्रिक संस्कृति थियो । अहिले त्यो छैन । त्यसका लागि तपाईहरुले पहल गर्नुपर्छ ।’ डा. शेखरले भने ।
कांग्रेस र नेकपा एमालेको संयुक्त सरकारका क्रियाकलापले आफू निराशा भएको भन्दै डा. काेइरालाले छिटोछिटो सरकार परिवर्तन हुने कार्यलाई रोकेर देशमा स्थीरता कायम गर्न दुई ठूला दलको सरकार बनाइएकाे जिकीर गरे । तर सो अनुसार गठबन्धन सरकारले राम्राे परिणाम दिन नसकेको काेइरालाकाे ठहर छ । एमालेसँग नेपाली कांग्रेसले सहकार्य र प्रतिष्पर्धा सँगसँगै गर्नु परेको बताउँदै उनले भने,‘सरकारमा सहकार्य र राजनीतिमा प्रतिस्पर्धा गर्नुपर्ने बाध्यता रहेकाले कांग्रेस चनाखो हुनुपर्छ ।’
सुदूरपश्चिमको ३ दिने भ्रमणमा रहेका उनले बिहान भातृ तथा शुभेच्छुक संस्थाहरुसँग अन्तरक्रिया तथा छलफल गरेका थिए । उक्त भेटघाटमा सबै भातृ तथा शुभेच्छुक संस्थाहरुको तोकिएको समयमा महाधिवेशन हुनुपर्ने बताए । सुदूरपश्चिम भ्रमणमा डा. शेखरसँग कांग्रेस नेता डा. सुनिल शर्मा लगायत नेताहरू सहभागी छन् ।
0 प्रतिकृया