काठमाडौं । नेकपा एमालेकी सांसद तथा पूर्वमन्त्री भगबती चौधरीले सरकारले ल्याएको नीति तथा कार्यक्रम सन्तुलित, यथार्थपरक, वस्तुपरक र राष्ट्रिय आवश्यक्ता अनुरुप भएको बताउनु भएको छ । संघीय संसदको निती तथा कार्यक्रम माथिको छलफलमा भाग लिँदै सांसद चौधरीले विगतका सरकारका नीति तथा कार्यक्रम भन्दा यो पटकको नीति तथा कार्यक्रम राष्ट्रिय आकांक्षालाई पुरा गर्ने गरी आएको बताउनु भयो । 

‘यो नीति तथा कार्यक्रम बर्तमान समयमा यथार्थपरक, वस्तुपरक, राष्ट्रिय आवश्यक्ता अनुरुपको छ । युवा लक्षित, स्वरोजगारमुखी छ ।’ सांसद चौधरीले युवा स्वरोजगार, स्टार्टअप विजनेशलाई प्रोत्साहन, आपतकालिन आवासको व्यवस्थापन, निर्माण, अब्यवस्थित सहरलाई व्यवस्थित गर्ने साना तथा मझौला उद्योगीलाई व्यवसायीमुखी बनाउने नीति तथा कार्यक्रमको विशेषता रहेको भन्दै भन्नुभयो । 

यस्तै उहाँले रोजगार सृजना गर्न गरिबी न्यूनिकरण गर्नको लागि सहकारीताको मोडालिटीको प्रावधान आउनु सवल पक्ष रहेको बताउनु भयो । गुणस्तरीय शिक्षामा निजी विद्यालय र सामुदायिक विद्यालयहरुको पाठ्यक्रममा एकरुपता गर्ने, इ–लर्निङ जस्ता विषयहरु नीति तथा कार्यक्रममा समेटिनु सकारात्मक रहेको जिकीर गर्नुभयो । 

यस्तै विश्वविद्यालय शिक्षालाई अनुसन्धान र खोजमुलक बनाउँदै पढ्दै काम गर्ने, स्वरोजगार शिक्षा प्रणालीलाई बढोत्तरी गर्ने, उत्पादन र उत्पादकत्वमुखी, कृषि इको सिस्टम, डिजिटल बैंकिङ जस्ता कुराहरु नीति तथा कार्यक्रममा आउनु महत्वपूर्ण रहेको उहाँको धारणा छ । उहाँले नीति तथा कार्यक्रम अनुसार १६ औं पञ्चवर्षीय योजना समेतलाई समेट्दै सबै पक्ष र क्षेत्रलाई समेट्ने गरी बजेट निर्माण हुनेमा आफु आशावादी रहेको पनि बताउनु भयो ।