काठमाडौं । डाक्टर सुनिल कुमार शर्माको निःशुल्क स्वास्थ्य शिविरबाट ७३५ जना लाभान्वित भएका छन् । काठमाडौंको बुढानिलकण्ठ नगरपालिका वडा नं. ३ मा काठमाडौं मेडिकल कलेजका स्वास्थ्यकर्मी सम्मिलित निःशुल्क स्वास्थ्य शिविरबाट सो क्षेत्रका ७३५ जना सर्वसाधारण लाभान्वित भएका हुन् । 

शिविरमा १३७ जनाको इसिजी, १६३ जनाको ल्याब परीक्षण, २४५ जनाको भिडियो एक्सरे तथा १३ जनाको दाँत निकालिएको केएमसीका प्रमुख प्रशासकीय अधिकृत तथा प्रबन्धक नारायण दाहालले जानकारी दिनुभयो । शिविरमा आएका मध्ये २३ जनालाई थप उपचारका लागि रेफर समेत गरिएको छ । 

शिविरमा केएमसीका चिकित्सकहरुले बाल रोग, स्त्री रोग, जनरल मेडिसिन, नसा तथा हाडजोर्नी, दन्त रोग, आँखा रोग लगायतको सेवा दिएका थिए । शिविरबाट गरिब, विपन्न, महिला, बालबालिका तथा ज्येष्ठ नागरिक बढी लाभान्वित भएको केएमसीले जनाएको छ । 

नेपाली कांग्रेसका प्रभावशाली नेता मोरङ निर्वाचन क्षेत्र नं. ३ का सांसद डा. सुनिल कुमार शर्माले जनतालाई घरदैलोमै स्वास्थ्य सेवा प्रदान गर्ने उद्देश्यले निःशुल्क स्वास्थ्य शिविरको अभियान सञ्चालन गर्नुभएको हो ।