काठमाडौं । नेपाली कांग्रेस सांसद डाक्टर सुनिल कुमार शर्माको निःशुल्क स्वास्थ्य शिविरबाट भक्तपुरको पुरानो ठिमीमा ४८७ जना सर्वसाधारण लाभान्वित भएका छन् । काठमाडौं मेडिकल कलेजका चिकित्सक सम्मिलित निःशुल्क स्वास्थ्य शिविरबाट मध्यपुर ठिमी वडा नं. ६ का स्थानीय लाभान्वित भएका हुन् । 

शिविरमा ११० जनाको ल्याब परीक्षण, १२८ जनाको भिडियो एक्सरे, ८६ जनाको इसिजी गरिएको केएमसीका प्रबन्धक तथा प्रमुख प्रशासकीय अधिकृत नारायण दाहालले जानकारी दिनुभयो । शिविरबाट २६ जनालाई थप उपचारका लागि रेफर गरिएको छ । शिविरमा नाक, कान घाँटी, स्त्री रोग, आँखा रोग, जनरल मेडिसिन, नसा तथा हाडजोर्नी, बाल रोग लगायतको सेवा दिइएको थियो । 

सांसद शर्माले जनताको घरदैलोमै स्वास्थ्य सेवा पुर्याउने अभिप्रायले निःशुल्क स्वास्थ्य शिविर चलाउँदै आइरहनु भएको छ । डा. शर्माले केएमसीसँगै बिराटनगरको नोबेल शिक्षण अस्पतालबाट निःशुल्क स्वास्थ्य शिविर चलाउने तथा गरिब, विपन्न, अशक्त, असहायको निःशुल्क उपचार समेत गर्दै आइरहनु भएको छ ।