काठमाडाैं । चिकित्सा शिक्षा आयोगले चिकित्सा शिक्षा अन्तर्गत स्नातक तहका विभिन्न विषयमा विद्यार्थी भर्नाका लागि सीट संख्या बढाउने निर्णय गरेको छ । आयोगका अध्यक्ष समेत रहेका प्रधानमन्त्री केपी शर्मा ओलीको अध्यक्षतामा बसेको को २१औं बैठकले स्नातक तहमा १ हजार ३ सय ५९ सिट थप गर्ने निर्णय गरेको हो ।

एमबीबीएसमा सबै कलेजहरुमा गरेर कुल ४९५ सिट थप गर्ने निर्णय भएको छ । यसअघि एमबीबीएसका लागि २ हजार १ सय ४० सिट रहेकाेमा अब एमबीबीएसको सिट संख्या २ हजार ६ सय ३५ पुगेको छ । 

यस्तै नर्सिङ तर्फ बीएस्सी र बीएनएससहित ५६२ सिट थप गरिएकाे छ । बीएस्सी नर्सिङमा ४४० सिट थप गर्ने निर्णय भएको छ। यसअघि बिएस्सी नर्सिङमा १ हजार ९ सय ९० सिट रहेकोमा अब उक्त संख्या बढेर २ हजार ४ सय ३० पुगेको छ ।

बिएनएस तर्फ १२२ सिट थप गरिएकाे छ । बिएनएसमा यसअघि ९४० सिट थियो । यसअघि बिपिएचमा ६५० सिट रहेकाेमा ६२ सिट थप गरेर ७१२ पुर्याइएकाे छ । 

बिफार्मेसीमा पनि १४० सिट संख्या बढेको छ । यसअघि ६९५ सिट रहेकोमा उक्त संख्या बढेर ८३५ पुगेको छ । आयोगले बीएमएसको सिट संख्या भने घटाउने निर्णय गरेको छ । गत वर्ष एक सय सिट संख्या रहेको उक्त विषयमा ३५ सिट घटाएर अब ६५ सिट मात्र कायम गरिएकाे छ ।