काठमाडौं । प्रधानमन्त्री सुशीला कार्कीले आफ्नो ६ महिने कार्यकाल सफलतापूर्वक सम्पन्न गरी नवनिर्वाचित सरकारलाई सत्ता हस्तान्तरण गर्नुअघि बिहीबार राष्ट्रका नाममा विशेष सम्बोधन गरेकी छन् । भदौ २३ र २४ मा भएको ‘जेन्जी’ आन्दोलनपछिको जटिल परिस्थितिमा सरकारको नेतृत्व सम्हालेकी कार्कीले आफ्नो कार्यकालमा देशलाई पुनः लोकतान्त्रिक तथा संवैधानिक मार्गमा फर्काउन सफल भएको दाबी गर्दै सन्तोष व्यक्त गरिन् ।

सम्बोधनका क्रममा उनले भनिन्, “म आज पूर्ण आत्मविश्वासका साथ देशको उज्यालो भविष्य देखिरहेको छु, जहाँ हाम्रो एकता र इमानदारीले नयाँ इतिहास रच्नेछ ।” सम्बोधनको सुरुवातमै प्रधानमन्त्रीले ‘जेन्जी’ आन्दोलनका क्रममा ज्यान गुमाएका ७६ जना सहिदप्रति श्रद्धाञ्जली व्यक्त गरिन् । साथै, २ हजार ६ सयभन्दा बढी घाइतेको शीघ्र स्वास्थ्यलाभको कामना गर्दै प्रभावित परिवारलाई राज्यले साथ नछोड्ने प्रतिबद्धता जनाइन् । 

त्यस्तै आन्दोलनबाट करिब ८४ अर्ब रुपैयाँ बराबरको भौतिक क्षति भएको उल्लेख गर्दै उनले देश पुनर्निर्माणमा एकजुट हुन आह्वान पनि गरिन् । आफ्नो सरकारको प्रमुख उपलब्धिका रूपमा प्रतिनिधि सभाको निर्वाचनलाई उल्लेख गर्दै उनले फागुन २१ गते देशभर एकै चरणमा शान्तिपूर्ण रूपमा निर्वाचन सम्पन्न हुनु ऐतिहासिक सफलता भएको बताइन् । निर्वाचन आयोग, सुरक्षा निकाय र मतदाताको सक्रियताप्रति उनले आभार प्रकट गरिन् ।

सुशासनतर्फ पनि प्रगति भएको दाबी गर्दै प्रधानमन्त्रीले अख्तियार दुरुपयोग अनुसन्धान आयोग र नेपाल प्रहरीको केन्द्रीय अनुसन्धान ब्युरोलाई व्यावसायिक स्वतन्त्रता प्रदान गरिएको जानकारी दिइन् । मंसिर २४ गते आन्दोलनकारी पक्षसँग भएको सम्झौताको कार्यान्वयनमा निरन्तरता दिन नयाँ सरकारलाई आग्रह गर्दै उनले छानबिन आयोगको प्रतिवेदन सार्वजनिक गर्ने निर्णय भइसकेको उल्लेख गरिन् । साथै, प्रभावित उद्योग व्यवसायलाई राहत दिन ‘एकीकृत व्यावसायिक पुनरुत्थान योजना’ लागू गरिएको जानकारी दिइन् ।

युवाको नेतृत्वमा गठन हुन लागेको नयाँ सरकारलाई शुभकामना दिँदै उनले भ्रष्टाचार नियन्त्रण र रोजगारी सिर्जनामा ठोस उपलब्धि हासिल हुने अपेक्षा व्यक्त गरिन् । सम्बोधनको अन्त्यमा उनले भनिन्, “मेरो कार्यकालमा कुनै पनि काम खराब नियतले गरिएको छैन । यदि कमजोरी भए त्यसको जिम्मेवारी म स्वयम् लिन्छु, तर सफलताको श्रेय सम्पूर्ण नेपाली जनतालाई जान्छ ।”

हेर्नुहाेस् प्रधानमन्त्री कार्कीकाे संवाेधनकाे पूर्णपाठ