काठमाडौं, २ असोज । प्रेस काउन्सिल नेपालको ५३ औं बार्षिकोत्सव तथा सातौं संविधान दिवसको पूर्वसन्ध्यामा आयोजित वृहद् निःशुल्क स्वास्थ्य शिविरमा काठमाडौं मेडिकल कलेजले पाँचसय बढीको निःशुल्क स्वास्थ्य परीक्षण गरेको छ । प्रेस काउन्सिल नेपालको कार्यालय सञ्चारग्राम तिलगंगामा आयोजित निःशुल्क स्वास्थ्य शिविरमा सञ्चारकर्मीहरु सहित ५१४ जनाको निःशुल्क स्वास्थ्य परीक्षण गरिएको हो ।

केएमसीका जनरल मेनेजर नारायण दाहालले उक्त कार्यक्रममा जनरल ९८, सर्जरी ३६, दन्त ३१, स्त्री राेग २१, ल्याब १०२, हाडजाेर्नी तथा नसा राेग २८ जनाकाे परीक्षणा गरिएकाे जानकारी दिए । दाहालका अनुसार उक्त शिविरमा नाक कान घाँटी १३ जना, भिडियाे एक्सरे ८२ जना, इसिजी १०३ जना गरी ५१४ जनाकाे निःशुल्क स्वास्थ्य परीक्षण गरिएकाे थियाे ।

स्वास्थ्य शिविरमा जनरल मेडिसिन, स्त्री रोग, शल्यक्रिया सर्जरी, हाडजोर्नी तथा नशा, छाला रोग, नाक कान घाँटी, आँखा, दन्त तथा बाल रोग विशेषज्ञ डाक्टरहरुले सेवा प्रदान गरेका थिए । त्यस्तै शिविरमा इसिजी, भिडियो एक्सरे तथा ल्याब सम्बन्धी सेवाहरु समेत निःशुल्क दिइएको थियो ।

केएमसीका कार्यकारी अध्यक्ष डा. सुनिल शर्माले सञ्चारकर्मीहरुको स्वास्थ्य प्रति केएमसी सचेत रहेको बताउँदै सञ्चारजगतसँग सहकार्य गरेर अगाडी बढ्ने बताएका छन् । निःशुल्क स्वास्थ्य शिविरमा सञ्चारकर्मी तथा उनीहरुका परिवारले समेत सेवा लिएका थिए ।