काठमाडौं, १२ असोज । सिनामंगल स्थित काठमाडौं मेडिकल कलेजले बुढानिलकण्ठ नगरपालिका वडा नं. १० मा निःशुल्क स्वास्थ्य शिविर आयोजना गरेको छ । केएमसीले जुगल नव गुरुकुल स्कुलमा जिपी फाउण्डेशनको सहकार्यमा निःशुल्क स्वास्थ्य शिविर गरेको हो ।

केएमसीका जनरल मेनेजर नारायण दाहालका अनुसार उक्त शिविरमा ७५६ जनाको निःशुल्क स्वास्थ्य परीक्षण गरिएको थियो । स्वास्थ्य शिविरमा आएका मध्ये १४७ जनाको इसिजी, २०३ जनाको ल्याव परीक्षण, १९७ जनाको भिडियो एक्सरे गरिएको छ । साथै, शिविरमा आएका १३ जनाको दाँत खोलिएको तथा ३७ जनालाई थप उपचारका लागि ओ.टी. रेफर गरिएको केएमसीका जनरल मेनेजर दाहालले जानकारी दिए ।

केएमसीले विभिन्न सामाजिक संस्था, क्लबहरुसँगको सहकार्यमा विगत दुई वर्षदेखि निरन्तर निःशुल्क स्वास्थ्य शिविरहरु चलाउँदै आइरहेको छ । केएमसीका कार्यकारी अध्यक्ष डा. सुनिल शर्माले गाउँगाउँमा केएमसीको स्वास्थ्य सेवा पुर्याउने अभिप्रायले निःशुल्क स्वास्थ्य शिविर सञ्चालन गरिएको हो । डा. शर्माले विराटनगरस्थित नोबेल शिक्षण अस्पतालबाट पनि हज्जारौं सर्वसाधारणलाई निःशुल्क स्वास्थ्य सेवा प्रदान गरेका छन् ।

उक्त स्वास्थ्य शिविरमा नाक कान घाँटी, आँखा रोग, दन्त रोग, जनरल मेडिसिन, मृगौला, स्त्री रोग, बालबालिका सम्बन्धी रोगका विशेषज्ञ डाक्टरहरुले सेवा प्रदान गर्दै आइरहेका छन् ।