इटहरी, २५ कार्तिक । सुनसरीको निर्वाचन क्षेत्र नं. ३ मा नेपाली कांग्रेसका उम्मेदवार बिजयकुमार गच्छदारले प्रचारप्रसारका क्रममा व्यापक रुपमा निर्वाचन आचारसंहिता विपरितका कार्य गरेका छन् ।

गच्छदारले निर्वाचन आयोगको आचारसंहिता विपरित ठाउँठाउँमा फ्लेक्स व्यानरहरु राखेका छन् । गच्छदारले मतदातालाई आकर्षित गर्न आफ्नो फोटो राखेर ठूल्ठूला फ्लेक्सहरु चोक चोकमा झुण्ड्याएका हुन् ।

निर्वाचन आचारसंहिता अनुसार उम्मेदवारले निर्वाचन आयोगले तोके अनुसारको प्रचार सामग्री प्रयोग गर्नुपर्नेमा गच्छदारले सो विपरित ठूल्ठूला रंगीन फ्लेक्स नै राखेका छन् । दुहवी नगरपालिका वडा नं. ११ तनमुनाको मुख्य चौकमा गच्छदारले आफ्नो तथा प्रदेश सभा (१) का उम्मेदवार विन्देश्वर यादवको फोटो सहितको फ्लेक्स राखेका छन् ।

यस्तैगरी उनले तनमुना, सिमरिया, पचिरा, मधेली, बर्जु लगायत ग्रामिण क्षेत्रमा यस्ता फ्लेक्सहरु राखेका छन् । निर्वाचन अधिकृतको कार्यालयले आचारसंहिता पालन भएको नभएको अनुगमन गर्न कर्मचारीहरु खटाएपनि चौकचौकमा राखिएका यस्ता फ्लेक्सहरुमा आँखा लगाएको छैन । यस्तै गच्छदारले आचारसंहिता विपरित मन्दिर, मस्जिदमा पनि झण्डा र फ्लेक्स राखेका छन् । बालबालिकाहरु पनि प्रयोग गरिएको पाइएको छ ।  

निर्वाचन अधिकृतको कार्यालय क्षेत्र नं. ३ दुहवीका प्रमुख उमाकान्त पौडेलले क्षेत्रमा नेपाली कांग्रेसले निर्वाचन आचारसंहिता विपरित प्रचारप्रसार गरेको जानकारी आएको बताउँदै आज नै सर्वदलीय बैठक बोलाएर त्यस्ता प्रचार सामग्रीहरु १ घण्टा भित्र हटाउन निर्देशन दिने बताए । पार्टीहरुले आचारसंहिता विपरितका प्रचारसामग्री नहटाए आयोगले प्रहरी लगाएर आफैं हटाउने पनि जनाए ।

‘आचारसंहिता विपरित प्रचारप्रसार भयो, चोक, पसल, मन्दिर, पोलहरुमा झण्डा, व्यानर र फ्लेक्सहरु राखेको थाहा भयो । आज (शुक्रबार) नै ३ बजे सर्वदलीय बैठक बोलाएको छु । त्यहाँ छलफल गरेर १ घण्टा भित्र हटाउन भन्छु, नहटाए प्रहरी लगाएर भएपनि हटाइनेछ ।’ प्रमुख पौडेलले भने ।

सुनसरी क्षेत्र नं. ३ मा व्यापक रुपमा आचारसंहिता विपरितका कार्यहरु भइरहेपनि आयोगको खासै ध्यान जान सकेको छैन ।