बेलबारी, २६ कार्तिक । मोरङको ३ नम्बर निर्वाचन क्षेत्रमा नेपाली कांग्रेसबाट उम्मेद्वारी दिएका डा. सुनिल शर्माले बेलबारीको बेतना सिमसारअगाडि सर्पदंश उपचार केन्द्र स्थापना गर्ने बताएका छन् ।

मंसिर ४ मा हुने प्रतिनिधि सभा र प्रदेश सभाको निर्वाचनको प्रचारप्रसारका क्रममा घरदैलो अभियानमा रहेका डा. शर्माले सर्पदंशको उपचार तत्कालै गर्नुपर्ने हुँदा बेलबारीबाट धरान वा विराटनगर लैजान सम्भव नहुने बताए ।

स्थानीय स्तरमै तत्काल उपचारको व्यवस्था मिलाउन सर्पदंश उपचार केन्द्र सञ्चालनको योजना बनाएको उनको भनाइ छ । किसान परिवारको बसोबास उल्लेख्य रहेको बेलबारी क्षेत्रमा वर्षेनी सर्पदंशबाट मानिसहरुको ज्यान जाने गरेकाले स्थानीय स्तरमै सञ्चालन हुने सर्पदंश उपचार केन्द्रले नागरिकको जीवनरक्षामा महत्वपूर्ण भूमिका खेल्ने उनको भनाइ थियो ।