काठमाडौं, २८ मंसिर । गाउँपालिकामा निर्वाचित जनप्रतिनिधिहरुलाई विकास अभियन्ताका रूपमा काम गर्न नेकपा (एमाले) का अध्यक्ष केपी शर्मा ओलीले निर्देशन दिएका छन् । उनले आर्थिक काममा पारदर्शी र स्वच्छतालाई विशेष रुपमा ध्यान दिन आग्रह गरे ।

पार्टी कार्यालय च्यासलमा आयोजित पार्टीबाट निर्वाचित गाउँपालिकाका जनप्रतिनिधिहरूको भेटघाट कार्यक्रममा अध्यक्ष ओलीले गाउँपालिकाका अध्यक्ष, उपाध्यक्ष, वडाध्यक्षहरूलाई जनताका काममा नमूना र आदर्श जनप्रतिनिधिका रूपमा काम गर्न निर्देशन दिए । उनले विकास र समृद्धिका लागि एमालेले देशमा राजनीतिक स्थायित्व र स्थिरता चाहे पनि वर्तमान जनादेशले मुलुकमा इतिहासमै सबैभन्दा अस्थिर अवस्था सिर्जना गरेको बताए ।
 
‘निर्वाचनमा हामीले देश बनाउन स्पष्ट नीति, दृष्टिकोणका साथ एमालेलाई बहुमत मागेका थियौं तर बहुमत प्राप्त गर्ने गरी जनतालाई सचेत गराउन सकेनछौं ।’ ओलीले भने । निर्वाचनमा जनमत डाइभर्ट भएको सन्दर्भमा अध्यक्ष ओलीले भ्रममा परेको असचेत जनता खतरनाक हुने बताउँदै जनतालाई सचेत बनाउने अभियानमा लाग्नुपर्ने बताए ।

उनले पार्टीको पनि स्थानीय नेतृत्व तहमा रहेका जनप्रतिनिधिलाई जनता र कार्यकर्ताको मनोबल उठाउने गरी काम गर्न निर्देशन दिँदै भने ‘शालिनतापूर्वक जनताको सेवक भएर काम गर्नूस् । काम गर्दा सामुहिक तरिका अपनाउनूस् । पार्टीसँग निरन्तर समन्वयमा काम गर्नूस् ।’

चौतर्फी घेराबन्दी र सत्ता गठबन्धनमा रहेका दलहरूबाट बुथ कब्जा गरी जनताको मताधिकार लुटिँदा पनि लोकप्रिय मत एमालेले प्राप्त गरेको र जनताले एमालेप्रति अत्यन्त स्नेह प्रकट गरेको उनको भनाई थियो । अध्यक्ष ओलीले देशको अर्थतन्त्र ओरालोतर्फ लागिरहेको समाज साँस्कृतिक रूपमा विश्रृंखलित हुँदै गएको उल्लेख गर्दै गठबन्धनमा रहेका दलहरूलाई यसप्रति कुनै चिन्ता नरहेको पनि बताए । ‘यिनीहरुलाई प्रधानमन्त्री को बन्ने भन्ने मात्र चिन्ता छ ।’ ओलीले भने  

कार्यक्रममा महासचिव शंकर पोखरेलले स्थानीय जनप्रतिनिधिहरुलाई जनतासँगको सम्बन्ध घनिष्ट बनाई काम गर्न निर्देशन दिए । उनले स्थानीय निर्वाचनमा जारी गरिएको घोषणापत्रलाई मार्गदर्शनका रूपमा लिएर काम गर्न र यस अघि काठमाडौंमा भएको भेलाबाट जारी २० बुँदे काठमाडौं संकल्पलाई जीवनशैली बनाउन निर्देशन दिए ।

विगतमा जनप्रतिनिधिले स्थानीय तहमा गरेका विकास निर्माण र जनताका सरोकारका कामलाई पार्टीको विषय बनाउन नसक्नु कमजोरीका रूपमा रहेको बताउँदै महासचिव पोखरेलले स्थानीय तहमा निर्वाचित जनप्रतिनिधिले आफूलाई पार्टीको पनि प्रतिनिधि सम्झेर काम गर्नुपर्ने बताए ।

महासचिव पोखरेलले गत बैशाखमा सम्पन्न स्थानीय तहको निर्वाचनमा पालिका जितेको ठाउँमा अहिले एमालेको भोट घटेको बताउँदै यसबाट जनताको अपेक्षा र त्यसको आपूर्तिमा खाडल छ, तालमेल भएन भन्ने बुझेर काम थाल्नुपर्ने धारणा राखे । उनले बर्ग सङ्घर्ष गर्नुपर्ने मुख्य थलो संसदीय निर्वाचन भएको र चुनावका समयमा पार्टीविरूद्ध लाग्नेहरू पार्टीको कार्यकर्ता हुन नसक्ने बताउँदै पार्टीमा शुद्धिकरण आवश्यक रहेको पनि जनाए ।