काठमाडौं, १२ पुस । संघीय संसद् सचिवालयले प्रतिनिधि सभा र राष्ट्रिय सभाको संयुक्त बैठक आह्वान गरेको छ । मंगलबार एक सूचनामार्फत संसद् सचिवालयले पुस २५ गते दुवै सदनको बैठक आह्वान गरेको हो ।

राष्ट्रपति विद्यादेवी भण्डारीको निर्देशनमा संघीय संसद् भवनमा बैठक बोलाइएको संसद्का महासचिव भरतराज गौतमले जानकारी दिए । राष्ट्रपति भण्डारीले  सरकारको सिफारिसमा पुस २५ गते सोमबार दिउँसो १ बजे अन्तर्राष्ट्रिय सम्मेलन केन्द्र नयाँबानेश्वरमा बस्नेगरी दुवै सदनको अधिवेशन आह्वान गरेकी हुन् ।

निर्वाचनको अन्तिम परिणाम घोषणा भएको एक महिनाभित्र संसद्‌को पहिलो बैठक बस्नुपर्ने संवैधानिक प्रावधान छ । गत मंसिर ४ मा सम्पन्न भएको निर्वाचनको अन्तिम नतिजाको प्रतिवेदन मंसिर २९ गते राष्ट्रपतिसमक्ष निर्वाचन आयोगले बुझाएको थियो ।