काठमाडौं । जिल्ला प्रशासन कार्यालयको अनुमति बिना बालबालिकालाई अभिभावकबाहेक अरूले एक स्थानबाट अर्कोमा लैजान नपाउने भएका छन् । गृह मन्त्रालयले सोमबार विज्ञप्ति जारी गर्दै आमा–बुवा र अभिभावकबाहेक अन्य व्यक्ति वा संस्थामार्फत् बालबालिकाहरूलाई नेपालभित्र एक स्थानबाट अर्कोमा लैजानु पर्दापनि सम्बन्धित तह (जिल्ला प्रशासन) को सिफारिस लिनुपर्ने जनाएको छ ।

अध्ययनको अवसर दिलाउने, पालनपोषण गरिदिने भन्दै संघ संस्थाको नाममा बालबालिकाहरूलाई लिने र विदेश पठाएर घरेलु कामदारको रूपमा प्रयोग गरेको गुनासो तथा उजुरी मन्त्रालयमा परेपछि गृह प्रशासनले उक्त निर्णय गरेको हो ।

बालबालिकाहरूलाई श्रम शोषण तथा यौन शोषण गर्नेलगायतका गैरकानुनी क्रियाकलापमासमेत सहभागी गराएको उजुरी परेको मन्त्रालयले जनाएको छ ।  गृह मन्त्रालयले जारी गरेको विज्ञप्तिमा नेपालबाट विदेशमा शैक्षिक प्रयोजनको लागि शिक्षा, विज्ञान तथा प्रविधि मन्त्रालयको एनओसी पत्र, एनओसी जारी नहुने हकमा स्थानीय प्रशासनको स्वीकृति चाहिने उल्लेख छ ।

अन्य प्रयोजनको लागि भए महिला बालबालिका तथा जेष्ठ नागरिक मन्त्रालय र सम्बन्धित देशको सरकारी निकायले प्रदान गरेको अनुमति वा स्वीकृति पत्र भएमा मात्र लैजान पाउने व्यवस्था गरिएको छ ।

हेर्नुहोस गृह मन्त्रालयको सूचना