काठमाडौं । पूर्वमन्त्रि प्रेमबहादुर सिंह नेतृत्वको समाजवादी जनता पार्टी नेकपा एमालेमा विलय भएको छ । अध्यक्ष सिंहसहित सिंगो पार्टी पंक्ति नै एमालेमा विलय भएको हो । उनलाई आज काठमाडौंमा आयोजित कार्यक्रममा एमाले अध्यक्ष केपी शर्मा ओलीले स्वागत गरेका छन् ।

माओवादी केन्द्रका अध्यक्ष पुष्पकमल दाहाल प्रचण्ड २०७३ सालमा प्रधानमन्त्री हुँदा उनी खानेपानीमन्त्रि बनेका थिए । उनीसँगै अभिनेत्री करिश्मा मानन्धर समेत एमाले प्रवेश गरेकी छिन् ।

पूर्व प्रधानमन्त्री डा. बाबुराम भट्टराई  नेतृत्वको नयाँ शक्ति पार्टीबाट राजनीतिक करिअर सुरुवात गरेकी थिइन् । तर, केही समय राजनीतिबाट निष्कृय रहेकी करिश्मा एमालेको राजनीतिमा प्रवेश गरेकी हुन् ।

ओलीकाे भाषण सुनेर थाक्दिनँः करिश्मा

एमाले प्रवेश गर्दै अभिनेत्री करिश्माले आफू चलचित्र क्षेत्रमा सक्रिय रहँदै आएपनि यस क्षेत्रको विकासका लागि राजनीतिमा लागेको बताइन् । देशको विकास र समृद्धिका लागि एमालेबाट राजनीति गर्ने सोचका साथ पार्टी प्रवेश गरेको उनले जानकारी दिइन् । अध्यक्ष ओलीकाे भाषण सुनेर आफू कहिल्यै नथाक्ने बताइन् ।

‘मैले एमाले नै किन रोजें ? पहिलो कारण–अध्यक्ष ओली हो । उहाँलाई फुर्काउन भनेको होइन । जनतालाई भिजन देखाउने, भविष्य सुनिश्चित गर्ने पात्र हो । सबभन्दा बढी उहाँको एनर्जी देखेर ताजुब भएको छु । अध्यक्ष ओलीको कुरा सुनेर थाक्दिनँ । अधिकांश भूभागमा जाँदा उहाँको गुनगान गाएको हुन्छु,’ मानन्धरले भनिन् ।

एमाले प्रवेश गर्नुको दोस्रो कारणबारे करिश्माले एमालेले परिवर्तन र समृद्धिको रियल एजेण्डा बोकेको बताइन्। साथै उनले आफू कुनै पदको लागि सौदाबाजी गरेर नआएको बताइन् । ‘मलाई यो चाहियो भन्ने, कुनै सौदाबाजी होइन । कुनै माग छैन । म एउटा नितान्त एमालेको कार्यकर्ता भएर काम गर्छु,’ उनले भनिन्, ‘जिम्मेवारी आए पछि पर्दिनँ ।’