काठमाडौं । नेपाल टेलिकमको प्रबन्ध निर्देशकमा सुनिल पौडेल नियुक्त भएका छन् । बिहीबार साँझ बसेको मन्त्रिपरिषद् बैठकले पौडेललाई टेलिकमको प्रबन्ध निर्देशकमा नियुक्त गरेको हो ।

सञ्चार तथा सूचना प्रविधि मन्त्रालयले संगीता पहाडी, बुद्धि आचार्य र पौडेलको नाम सिफारिस गरेको थियो ।

यस्तै बिहीबारकै मन्त्रिपरिषद् बैठकले  २० देशका लागि राजदूत नियुक्ति सिफारिस गरेकाे छ । मन्त्रिपरिषद्ले परराष्ट्र सेवाका ८ सहित २० जनालाई राजदूत नियुक्तिका लागि सिफारिस गर्ने निर्णय गरेको बैठकमा सहभागी एक मन्त्रीले जानकारी दिए ।

स्थानीय तहका लागि निर्वाचन आयोगले आचार संहिता लागू गर्ने तयारी गरिरहँदा आज बसेको मन्त्रिपरिषद् बैठकले नियुक्तिको निर्णय गरेको हो ।

राजदुत सिफारिसमा पर्नेहरूमा बिष्णुपुकार श्रेष्ठ- चीन, बासुदेव मिश्र-श्रीलंका, दानबहादुर तामाङ-दक्षिण अफ्रिका,  शर्मिला पराजुली ढकाल-स्पेन, मिलन तुलाधर-रूस रहेका छन् ।

यसैगरी, डिल्लीराज पौडेल-मलेसिया, शान्ता रिजाल-इजरायल, नवराज सुवेदी-साउदी अरेबिया, घनश्याम भण्डारी-बंगलादेश, दुर्गाबहादुर सुवेदी-जापान, निर्मलराज काफ्ले-ब्राजिल, भरतकुमार रेग्मी-अष्ट्रिया रहेका छन् ।

यस्तै, सुशीलकुमार लम्साल -इजिप्ट, कैलाश पोखरेल-अष्ट्रेलिया, डिल्लीराज पौडेल-कतार, ज्योति प्याकुरेल-दक्षिण कोरिया, रामसुरज राय यादव–डेनमार्करहेका छन् । डोरनाथ अर्याल, हरिशचन्द्र घिमिरे र तिर्थराज वाग्लेकाे देश छुट्याइएकाे छैन ।

सरकारले सिफारिस गरेका राजदूतहरुको संसदीय सुनुवाइ सकिएपछि राष्ट्रपतिले मनोनित गर्ने व्यवस्था रहेको छ ।