१७ जेठ २०८३, आइतवार
१७ जेठ २०८३, आइतवार
स्थानीय तहकाे निर्वाचनमा पुनः लड्न राजीनामा दिन थाले जनप्रतिनिधिहरू
एक्सन खबर
काठमाडाैं । स्थानीय तहकाे निर्वाचनमा पुनः उमेदवारी दिन जनप्रतिनिधिहरूले धमाधम राजीनामा दिन थालेका छन् । निर्वाचनका लागि उमेदवार मनोनयनको मिति नजिकिदै जाँदा आगामी नेतृत्वका लागि आकांक्षि बहालवाला जनप्रतिनिधिले राजीनामा दिन थालेका हुन् ।
निर्वाचन आचारसंहिता २०७८ को दफा ३६ अनुसार बहालवाला जनप्रतिनिधिले स्थानीय तहको कुनै पनि पारिश्रमिक, सुविधा पाउने गरी लाभको पदमा नरहेको उद्घोष गर्नुपर्ने र उम्मेदवारी दिनुअघि नै राजीनामा दिनुपर्ने व्यवस्था गरेको छ ।
दाङमा एक पालिका प्रमुखसहित ८५ जना जनप्रतिनिधिले राजीनामा दिएका छन् । वैशाख ३० मा हुने स्थानीय तह चुनावमा उमेदवारी दिनका लागि कार्यकाल सकिनु अगावै जनप्रतिनिधिले राजीनामा दिएका हुन् ।
दाङमा पनि मेयर, वडाअध्यक्ष, सदस्य र जिल्ला समन्वय समिति सदस्य गरी शुक्रबारसम्म ८२ जना जनप्रतिनिधिले राजीनामा दिएका हुन् । घोराहीमा नगरप्रमुख नरुलाल चौधरीले बिहीबार नै राजीनामा दिएको प्रमुख प्रशासकीय अधिकृत ऋषिराम केसीले जानकारी दिए । उनका अनुसार घोराहीमा अरु थप दुई जना वडा सदस्यले राजीनामा दिएका छन् ।
तुलसीपुरमा शुक्रबारसम्म १० वडा अध्यक्ष र २० सदस्यले राजीनामा दिएको प्रमुख प्रशासकीय अधिकृत मोहन पौडेले जानकारी दिए । त्यस्तै लमही नगरपालिकाका एक वडा अध्यक्ष र दुई सदस्य, गढवाका वडा अध्यक्ष र सदस्य १९ जना, राप्तीका १८, दंगिशरणका ३, शान्तिनगरका १, बबईका ४ र बंगलाचुलीका छ जना जनप्रतिनिधिले राजीनामा दिएका छन् ।
यस्तै, सिन्धुपाल्चोकको चौतारा साँगाचोकगढी नगरपालिकाका प्रमुख अमानसिं तामाङले पनि पदबाट राजीनामा दिएका छन्। तामाङले आज पदबाट राजीनामा दिएका हुन् । उनी नेकपा माओवादी केन्द्रबाट विजयी भएका थिए ।
यता, सप्तरी सदरमुकाम राजविराज नगरपालिका मेयर शम्भु यादवले आज पदबाट राजीनामा दिएका छन् । २०७४ को स्थानीय तह निर्वाचनमा उनी तत्कालीन राजपा तर्फबाट मेयर पदमा विजयी भएका थिए । उनी जनता समाजवादी पार्टीबाट अध्यक्ष पदमा उम्मेदवारको आकांक्षी हुन् । यादव पुन मेयरमा उम्मेदवारी दिनका लागि राजिनामा दिएका हुन्।
यस्तै, दमक नगरपालिकाको नगरप्रमुखको उम्मेदवार बन्न उपप्रमुख गीता अधिकारीले पदबाट राजीनामा दिएकी छन् । शुक्रबार नगरप्रमुख रोमनाथ ओलीसमक्ष राजीनामा दिएकी हुन् ।
अधिकारीसहित नगरप्रमुखका लागि दमकबाट नेकपा एमालेले तीनजना आकांक्षीको नाम माथिल्लो कमिटीमा उम्मेदवार छनोटका लागि पठाएको छ । अधिकारीसहित अम्बिका खनाल र होमबहादुर थापाको नाम पनि नगरमा भोट नै गरेर माथिल्लो कमिटीमा सिफारिस गरेको हो ।
चुनाव नजिकिएकाले राजीनामा दिइएको उनले बताइन् । ‘भोलि शनिबार बिदा भयो । आइतबार नोमिनेसनको हो । त्यसकारण आजै राजीनामा दिएँ,’ उनले भनिन् । अधिकारी लामो समय प्राध्यापन पेसाबाट २०७४ को स्थानीय तह निर्वाचनताका मात्र सक्रिय राजनीतिमा होमिएकी हुन् ।
त्यसबेला नेकपा एमालेले अधिकारीलाई उपप्रमुखको उम्मेदवार बनायो । उनी विजयी भइन् । दमक नगरपालिकाको उपप्रमुखको जिम्मेवारी सम्हालेपछि अधिकारी एमालेको दशौँ महाधिवेशनबाट केन्द्रीय सदस्य पनि भइन् ।
यसपटक उनीसहित सिफारिस गरिएका तीन नाममध्ये अधिकारी नगरप्रमुखको सशक्त दावेदार मानिन्छिन् । उपप्रमुख अधिकारीका श्रीमान् मदन अधिकारी एमाले अध्यक्ष केपी ओलीसँग निकट निर्माण व्यवसायी हुन् । यद्यपि मदन अधिकारीको मैनाचुली निर्माण कम्पनीले हुलाकी राजमार्गअन्तर्गत पर्ने बिरिङ नदीको पुल एक दशकदेखि अलपत्र पारेको छ ।
अधिकारीले मात्र हैन झापामा अन्य जनप्रतिनिधिले पनि राजीनामा दिन थालेका छन् । यसअघि गौरीगञ्ज गाउँपालिकाका उपाध्यक्ष दीपिन्द्र थापाले पनि अध्यक्ष पदमा आकांक्षा देखाउँदै राजीनामा दिइसकेका छन् ।
सप्तरीको विष्णुपुर गाउँपालिकाका अध्यक्ष लिलाम्बर यादवले पनि पदबाट राजीनामा दिएका छन् । २०७४ को स्थानीय तह निर्वाचनमा उनी नेपाली कांग्रेसकाबाट गाउँपालिका अध्यक्षमा विजयी भएका थिए ।
तर, ३० वैशाखमा हुने चुनावमा फेरि उम्मेदवारी दिने भन्दै यादवले पूर्वसन्ध्यामा राजीनामा दिएका हुन् । निर्वाचन आयोगले उम्मेदवार हुन चाहनेले कायम रहेको लाभको पदबाट राजीनामा गर्नुपर्ने प्रावधान कायम गरेका आधारमा उनले राजीनामा दिएका हुन् ।
यसैगरी सुनसरीकाे दुहवी नगरपालिकाका मेयर बेदनारायण गच्छदारले पनि राजीनामा दिएका छन् । बैशाख ३० गतेकाे स्थानीय तहकाे निर्वाचनमा उमेदवारी दिन गच्छदारले पदबाट राजीनामा दिएका हुन् । उनी सहित नगर उपप्रमुख सुनिता साह लगायत १२ वटै वडाका जनप्रतिनिधिहरूले राजीनामा दिएका छन् ।
मुगुमा दुईजना जनप्रतिनिधिले राजीनामा दिएका छन् । छायानाथ रारा नगरपालिका- २ का वडा अध्यक्ष परेक राज चौलागाईंले पदबाट राजीनामा दिएका छ्न् । उनी पुन नेकपा एमालेबाट वडा अध्यक्षमा चुनाव लड्ने तयारीमा छ्न् ।
यस्तै छायानाथ रारा नगरपालिका- ५ का वडा अध्यक्ष डम्मर रावलले शुक्रबार राजीनामा दिएका छन् । रावलले नेकपा एमालेबाट छायानाथ रारा नगरपालिकाको मेयरमा दाबी गरिरहेका छन् ।
हेटौंडा उपमहानगरपालिकाका ३६ जना जनप्रतिनिधिले राजीनामा दिएका छन् । हेटौंडाका ९ वडा अध्यक्षसहित ३६ जना निर्वाचित जनप्रतिनिधिले शुक्रबार उपमहानगरमा राजीनामा बुझाएका हुन् ।
राजीनामा दिने वडा अध्यक्षहरुमा हेटौंडा २ का हरि राउत, ३ नम्बर वडाका रामकुमार पुडासैनी, ४ का नविन सिग्देल, ७ का राजन थापा, ९ का लक्ष्मण भण्डारी, १२ का ललित घलान, १४ का दीपक खड्का, १८ का अनिल बानियाँ र १९ नम्बर वडाका नरनाथ सुवेदीले राजीनामा दिएका छन् ।
यसैगरी हेटौंडा उपमहानगरकै विभिन्न वडाका २७ जना वडा सदस्यहरुले पनि शुक्रबारनै राजीनामा दिएका छन् ।
0 प्रतिकृया