काठमाडौं, १८ मंसिर । सिनामंगल स्थित काठमाडौं मेडिकल कलेजले काठमाडौंको गोकर्णमा निःशुल्क स्वास्थ्य शिविर गरेको छ । गोकर्णेश्वर नगरपालिका वडा नं. ३ स्थित नव सुन्ताखान एकेडेमीको प्राङ्गणमा स्वास्थ्य शिविर गरिएको हो ।

लायन्स क्लब तथा स्वतन्त्र बचत तथा ऋण सहकारी संस्थासँगको सहकार्यमा आयोजित निःशुल्क स्वास्थ्य शिविरमा ७६३ जना बिरामीको स्वास्थ्य परीक्षण गरिएको केएमसीका जनरल मेनेजर नारायण दाहालले जानकारी दिए ।

दाहालका अनुसार स्वास्थ्य शिविरमा १३२ जनाको इसिजी, १९७ जनाको ल्याब परीक्षण, १८२ जनाको भिडियो एक्सरे गरिएको छ भने, स्वास्थ्य शिविरमा आएका मध्ये २१ जनाको दाँत खोल्दा ३२ जनालाई थप उपचारका लागि ओ.टी. रेफर गरिएको छ ।

विराटनगरका समाजसेवी डा. सुनिल शर्माले दुईवर्ष अगाडी केएमसीको नेतृत्व लिएसँगै सामाजिक उत्तरदायित्व अन्तरगत गाउँगाउँमा निःशुल्क स्वास्थ्य शिविर पुर्याउँदै आइएको छ । डा. शर्मा मंसिर ४ गते सम्पन्न प्रतिनिधि सभा निर्वाचनमा भारी मतका साथ निर्वाचित भएसँगै पदबाट राजिनामा दिएपनि केएमसीले सामाजिक उत्तरदायित्वका कार्यक्रमहरु नियमित गर्ने जनाएको छ ।