काठमाडौं, ११ पुस । प्रधानमन्त्री पुष्पकमल दाहाल 'प्रचण्ड'ले पदभार ग्रहण गरेका छन् । सोमबार साँझ सिंहदरबारस्थित प्रधानमन्त्री तथा मन्त्रिपरिषद्को कार्यालय पुगेर प्रचण्डले पदभार ग्रहण गरेका हुन् ।

सपथपछि सिंहदरबार पुगेर पदभार ग्रहण गरेका प्रचण्डले प्रधानमन्त्री कार्यालयको रणनीतिक सुधारका लागि अध्ययन गर्ने निर्णयमा हस्ताक्षर गरेका हुन् । प्रधानमन्त्री कार्यालयमा सुधार आवश्यक देखेर प्राधनमन्त्रीले यो निर्णय लिएको कार्यालयका प्रवक्ता महादेव पन्तले जानकारी दिए ।

मुलुकका कार्यकारी प्रमुख प्रधानमन्त्री रहने प्रधानमन्त्री तथा मन्त्रिपरिषद कार्यालय प्रभावकारी हुन नसकेको र कर्मचारी थन्क्याउने निकायको रुपमा बदनाम भएको भनी आलोचना हुँदै आएको थियो । प्रधानमन्त्री कार्यालयको सुदृढीकरण हुनुपर्ने आवाज उठिरहेका बेला पदभार ग्रहण गर्दै प्रधानमन्त्री प्रचण्डले त्यसको सुदृढीकरणका लागि अध्ययन गराउने निर्णय गरेका हुन् ।

महान्यायाधिवक्ता खातीले दिए राजीनामा

महान्यायाधिवक्ता खम्मबहादुर खातीले सरकार परिवर्तन भएसँगै पदबाट राजीनामा दिएका छन् । नयाँ सरकार गठन भएसँगै सरकारका कानुनी सल्लाहकार (महान्यायाधिवक्ता) खातीले पदबाट राजीनामा दिएका हुन् ।

सरकार फेरिएसँगै सरकारको कानुनी सल्लाहकार (महान्यायाधिवक्ता) पनि फेरिने प्रचलन छ । महान्यायाधिवक्ता खातीले प्रधानमन्त्री पुष्पकमल दाहाल ‘प्रचण्ड’ समक्ष राजीनामा पेस गरेका हुन् ।

निवर्तमान प्रधानमन्त्री शेरबहादुर देउवाले खातीलाई २०७८ साउन १ गते आफ्नो सरकारको कानुनी सल्लाहकार (महान्यायाधिवक्ता) नियुक्त गरेका थिए ।