भक्तपुर, २४ पुस । काठमाडौं मेडिकल कलेजले भक्तपुरको बालकोटमा निःशुल्क स्वास्थ्य शिविर आयोजना गरेको छ । सुर्यविनायक नगरपालिका वडा नं. ३ सँगको सहकार्यमा आयोजित निःशुल्क स्वास्थ्य शिविरमा ७६३ जना बिरामीको स्वास्थ्य परीक्षण गरिएको छ ।
सामाजिक उत्तरदायित्व अन्तरगत केएमसीले आयोजना गरेको निःशुल्क स्वास्थ्य शिविरमा सो क्षेत्रका महिला, बालबालिका, जेष्ठ्य नागरिक तथा सर्वसाधारणको उल्लेख्य सहभागीता रहेको थियो ।

केएमसीका जनरल मेनेजर नारायण दाहालका अनुसार स्वास्थ्य शिविरमा १०२ जनाको इसिजी, १८९ जनाको ल्याब परीक्षण, १७४ जनाको भिडियो एक्सरे गरिएको छ । त्यस्तै, ११ जनाको दाँत खोलिँदा १७ जनालाई थप उपचारका लागि ओ.टी. रेफर गरिएको केएमसीले जनाएको छ ।

केएमसीले पछिल्लो समय गाउँदेखि शहरसम्मै आफ्नो सेवाहरु पुर्याउन निःशुल्क स्वास्थ्य शिविर सञ्चालन गर्दा आम सर्वसाधारण लाभान्वित भइरहेका छन् । केएमसीको निःशुल्क स्वास्थ्य शिविरमा नाक कान घाँटी, स्त्री रोग, बालबालिका, जनरल मेडिसिन, आँखा रोग, दन्त रोग, नसा तथा हाडजोर्नीका चिकित्सकहरुले स्वास्थ्य परीक्षण गर्ने गर्छन् । साथै, स्वास्थ्य शिविरमा सामान्य प्रकारका बिरामीलाई औषधीहरु समेत निःशुल्क वितरण गर्ने गरिएको छ ।

हाल प्रतिनिधि सभा सदस्य समेत रहेका डा. सुनिल शर्माले केएमसीको नेतृत्व लिएसँगै स्वास्थ्य सेवालाई गुणस्तरीय बनाउँदै सर्वसुलभ बनाइएको हो । मंसिर ४ गतेको निर्वाचनमा निर्वाचित भएसँगै केएमसीको कार्यकारी अध्यक्ष पदबाट बाहिरिए पनि डा. शर्माको अभियानलाई निरन्तरता दिईदै आइएको छ ।